4
Johanezi Anuture ŋeŋe honewec â mumuteŋ gae manawec
No wiac i hone manac efârerâ ʒâŋe firâ mi sambâŋko motâc moc aaŋ domame honezepac i¡ Ehame dâŋ qanaŋ qeŋfânâŋ tinac manapo, ijaha mocwâc fuarâ ʒiŋuc nazawec: “Go ʒira wefutec juku wiac fuaocmu gaza gowatuc epe honec.” Iŋuc mume izia maŋnane ŋerisieme sambâŋko eri ŋeŋe moc ŋehame fainao moczi ŋeme honepo. Á eri ŋeŋeo ŋewec e hawarine ârâŋ ɋârizi bâbâroŋ findowakicne, â ŋeŋe botâŋnao huriri somâckerâ domawec, hawarine buge iŋucne erâ jawaririŋ kikicne. Erâ eri ŋeŋe sâko rârec rârec eri ŋeŋe gâcne 24 ŋerawec. Ŋeŋe irec faio ŋicqizec 24 ŋerambiŋ. Jaŋe ŋaqi qaŋqaŋ sasawa roŋembiŋ â eridu golzi-bakicne qizec-jeŋicko ŋerawec. Erâ eri ŋeŋe sâkoonec bâbâric â ɋuŋ parandaŋ fuahuc fowec, â eri ŋeŋe mainao ʒocbâruŋ 7 ʒawec, i Anuture mâro 7 jaŋere ʒoc. Erâ wâc eri ŋeŋe maio ine hâwec kiruŋzi bakicne tinac jawaririŋ kikicne fowec.
Erâ eri ŋeŋe maŋfuŋnao wiac jujune 4 ŋerambiŋ, jaŋe bu râpe-jeŋicko ʒâŋehec sasawa. Moc e laioŋ hawari iŋucne, moc e bulimakao ŋicne hawari iŋucne, moc e ʒâŋe maine ŋic hawari iŋucne, moc ine tucwipe fahareekac hawari iŋucne. Wiac jujune 4 jaŋe fakec-jeŋic 6 sasawa, erâ fakec-jeŋic faine â juwicne ʒâŋe-jeŋic jaha fowec. Erâ ŋafe furec wirahuc ʒiŋuc mueŋgopieŋ:
“Wofuŋ Anutu bapafâre, e tiri, tiri, tiri jaha,
juweczi jukac erâ wâc wareocmu.”
Eme wiac jujune 4 jaŋe eri ŋeŋeo ŋeekac, juju sanaŋ rune hâcne, e daŋge mumuteŋ â ʒeri bubiaŋ ecnepie sâc 10 ŋicqizec 24 jaŋe, eri ŋeŋeo ŋeekac, juju sanaŋ rune hâcne, ere maŋfuŋko fodaperâ mu ʒeri ecnehuc ŋeŋefuŋ-ticnao eridu-jeŋic ŋerâ ʒiŋuc mueŋgopieŋ:
11 “Wofuŋ-nâŋec Anutu,
eri qaraweŋ â ʒâŋe biŋe â tâpiri
i goki raucketec sâcke-hâmokac,
goki hâcne wiac sasawa bâfuameŋ,
â gore micte wiac fua-fârewec fokac.”