1 Eme no ʒâŋe firâ mi Lama Zioŋ tikio domame honezepac i¡ Erâ ehec ŋic 144 tauseŋ mâmâc domambiŋ. Mai-jeŋicko e jahacne ʒâŋe qâreŋ â Mamac-ticnere ʒâŋe qâreŋ fowec. 2 Eme sambâŋkonec dâŋfânâŋ manapo, i opâ sâro fânâŋ iŋucne â ɋuŋ fânâŋ sâko iŋucne. Erâ dâŋfânâŋ i manape musi tinac ewec, ŋic bocjaha musi bapie fânâŋkeekac iŋuc tinac manapo. 3 Jaŋe eri ŋeŋere maŋfuŋko â wiac jujune 4 â ŋicqizec jaŋere maio gae ɋâricne moc heeŋgopieŋ. Gae i ŋic gâcnezi he manac eene mi ewec, ŋic 144 tauseŋ, mâreŋŋic gâcne jaŋeraonec furi bacjopakicne, jaŋe sawa mamanane. 4 Jaŋe hâcne ŋokacko mi sâqorehuc maŋɋaɋac jaha jumbiŋ; jaŋe hâcne Lama jume ju ecneeŋgopieŋ; jaŋe hâcne mâreŋŋic gâcne jaŋeraonec Anuture â Lamare qaqasune bâbâni rocjopakicne. 5 Erâ micjeŋickonec burecdâŋ moc mi wahawec, jaŋe bahacmâc.

6 Eme no aŋelo moc honepo, e faic sawao fotâcnehuc rawec. E mâreŋŋic jaŋere Biŋebiaŋ fofo sanaŋ, mâreŋ sâc ŋic sahac hawari-jeŋic â dâŋmarac-jeŋic fuŋne fuŋne, jaŋere bajuwec. 7 Eki wiwic jaha wirahuc ʒiŋuc muwec: “Ŋoŋe Anutu araŋ bacnehuc sâsenʒepieŋ, okac dameŋ-ticne maickekac hâcne. Sambaŋ â mâreŋ, hâwec â opâ ʒâŋe bâfuawec e mu wâwâsic ecnenʒepieŋ.” 8 Iŋuc murâ rame râpefuŋnao aŋelo moczi warerâ ʒiŋuc wirawec: “Babe hae sâko tâtiekac, tâtie-jâmbâŋkekac, hae irec rune mâreŋ sâc ŋicne sasecte waiŋ opâ momori gumec-jopahuc jumbiŋ hâcne.” 9 Eme râpefuŋnao aŋelo âgo-ticne moczi warerâ dâŋ hahaŋne bahuc ʒiŋuc muwec: “Moc e qowi mimicne e jahacne me hawari-ticne dieŋzi hecneocmu â mai-ticnao me meticnao maqâreŋ roocmu, 10 e Anutuzi kimbeŋ-ticnere waiŋ opâ momori jâmbâŋ, opâ jâmbâŋhec mi bâsifuckekicne, i râqâc-ticnaonec gumeme tiri aŋelo â Lama jaŋere maio ʒocbâruŋko hurâ ʒâic serereŋ mana rahuc juocmu. 11 Eme ʒoczi ŋic iŋucne ʒâfitac-jopame irec hosâcne ŋezume ŋezu fehuc foocmu sanaŋ. Irec ŋic qowi mimicne â hawari-ticne dieŋzi hecnembiŋ jaŋe mecne, â ʒâŋe qâreŋ-ticne bajumbiŋ jaŋe mâmâc ʒâiczi mi behec-jopame ŋeŋe mana tâmiric ŋafe furec ʒuʒuhuc jaha mana rahuc juniŋmu.” 12 Dameŋ ira hâcne Anuture sâcmutâc dâŋ reŋkehuc Jesure miti hâwicmâc bajueŋgopieŋ tiriŋic i jaŋe sasanaŋ bâfuanʒepieŋ.

13 Eme sambâŋkonec dâŋ moc ʒiŋuc wahame manapo: “Go dâŋ ʒi qâreŋkec: Dameŋ ʒi fuŋkerâ, Wofuŋtao qohotahuc hâmoniŋmu jaŋere bubiaŋ manazo. Mârozi mukac, jâmbomac, jaŋe neneŋ gie-jeŋic hetararâ ŋemanahuc biaŋ-jopaocmu. Erâ juju bapa-jeŋicte fârinezi rapie raocmu.”

14 Eme no fipe feme karorac qaŋqaŋ ututuŋ fuame honepo. Erâ karorac faio moc ŋewec, e hawari-ticne ŋic iŋucne. Qizec-ticnao ŋicwofuŋ du golzi bakicne roŋewec â meticnezi sâqe mictara baŋewec. 15 Ehame ufuŋkonec aŋelo moczi waharâ karorac faio ŋewec, e ʒiŋuc wiracnewec: “Go sâqegezi gie fârine qa roro ec, mâreŋko giere fârine woze-fârewecte qa roro ezore dameŋne maickekac hâcne.” 16 Iŋuc mume karorac faio ŋeweczi sâqe-ticne wickeme mâreŋko fârine qafârewec.

17 Eme aŋelo moczi sambâŋko ufuŋkonec wahawec, e iŋuc jaha sâqe mictara bajuwec. 18 Warehame âgo-ticne moczi alata ŋeweckonec warewec. E ʒocte soŋaŋzi âgo-ticne sâqe mictara bajuwec e ʒiŋuc wiracnewec: “Go sâqege mictara mâreŋko waiŋ fârine qâtâcne-fârec, hândâŋne qeue-fârekac hâcne” 19 Mume aŋelo âgo-ticnezi sâqe wickeme mâreŋko waiŋ hândâŋne nâtâcneme Anutu kimbeŋ-ticnere katapa sâko irec maŋko beheme hufârewec. 20 Erâ hae râpeo âte pisickepie katapa maŋkonec socsâko wahahuc fowec. Wahaku ʒâkâŋne fuarâ becâsic mecqaŋeŋ-jeŋicko qawec. Á ʒâkâŋ rereŋ ʒoric-ticnere sâc ine 300 kilometa iŋuc ŋerawec.