1 Eme weniŋuc muzo? Sâqocnere gie bahuc jaha jupene aki anonoczi fua ɋârâŋkehuc sirickezejec, iŋuc muzo me? 2 Iŋuc misac¡ Sâqocne hâmocnembeŋzi wemocko irec maŋnao ʒuhuckerâ junaŋmu? 3 Me kecʒiŋuc mi manaŋgopieŋ? Miti Opâ ruahuc Jesu Kristorao ʒuhuckembeŋzi hâmoc-ticnao ŋeutuckembeŋ. 4 Ine hâcne, nâŋâc Miti Opâ ruahuc Kristohec mâmâc hâmo duduc ekicne, eme Mamac eri tatamac-ticnezi Kristo bâɋâreme hâmockonec faharewec jukac, iŋuc jaha nâŋâc ɋârerâ juju ɋâri moc junʒepeneŋ. 5 Nâŋâc hâmoc-ticnere hawari ehuc erao ʒuhuckembeŋte fafahare-ticnao sâc i jaha ehuc ʒuhuckenaŋmu. 6 Ʒiŋuc manaŋgopeneŋ: Maŋraŋɋa-nâŋec Jesuhec mâmâc maripoŋko qakicne, i maŋsahac-nâŋecko sâqocnere tâpiri ŋeŋgoroŋkeocte â sâqocnere kiŋaŋ mocwâc mi qanaŋte. 7 Moc e hâmome sâqocnere niŋgiŋ ŋetaracneocmu. 8 Kristohec hâmombeŋko ine ehuc wâc junaŋmu, iŋuc manapaŋkenaŋmu. 9 Kristore manaŋgopeneŋ, e hâmockonec fahareweczi mocwâc mi hâmoocmu, hâmoczi ŋicbomboŋ mocwâc mi ecneocmu. 10 Hâmowec i sâqocnere arec mocjaha hâmome tarawec eme ʒi jukac i Anuture erâ jukac. 11 Eme ŋoŋe iŋuc jaha ŋaŋacnere manapie sâqocne hâmocnembiŋ ehuc Jesu Kristo ehec Anutu jucneŋgopieŋ ezejec.

12 Sâqocnezi sahac-ŋeŋic sisirowenao ŋicbomboŋ eŋarezo mume mi manacnenʒepieŋ, â sahac-ŋeŋiczi sasecte suruc-ŋopame i wâc mi manacnenʒepieŋ. 13 Erâ wâc me sahac-ŋeŋic i hehesicte mi qikiŋnepie sâqocnere kiŋaŋ qazejec. Aricne, ŋoŋe hâmockonec bâɋârec-ŋopakicnezi Anuture gieo raʒinʒepieŋ, ehuc mesahac-ŋeŋic Anuture qikiŋnepie tiŋnere kiŋaŋ qazejec. 14 Ŋoŋe sâcmutâc dâŋko mâcne, Anuture aki anonocko jueŋgopieŋte sâqocnezi ŋicbomboŋ mi eŋareocmu.

15 Eme ʒi wenac ezo? Anuture aki anonocko raʒihapene sâcmutâc dâŋte aka râriewecte sâqocne bazo me? Iŋuc aricne¡ 16 Me ŋoŋe ʒiŋuc mi manaŋgopieŋ me? Ŋicbomboŋ moc maŋ sahac-ŋeŋic qikiŋnecnehuc micne reŋkeniŋmuzi ere kiŋaŋ qaqafâc erâ gie-ticne baniŋmu. Sâqocnezi ŋicbomboŋ-ŋeŋic eme ere kiŋaŋ qahuc juku hâmo sipiric eniŋmu me micrereŋzi ŋicbomboŋ-ŋeŋic eme ere kiŋaŋ qahuc tiŋkeniŋmu. 17 Ŋoŋe sâqocnere kiŋaŋ qaqa juwarembiŋ i tarawec, eme ʒi mitire hata qazu-ŋarekicne irec sâcko maŋzi manahuc reŋkeeŋgopieŋ irec Anutu muteŋkezo. 18 Ŋoŋe sâqocnaonec batarac-ŋopakicnezi tiŋnere kiŋaŋ qaqa embiŋ juŋgopieŋ. 19 Maŋraŋɋa-ŋeŋic gegec dodocnere ŋicko wiac fokac ira sâc hehuc dâŋ ŋazakopac. Ŋoŋe mârâc jaha me sahac-ŋeŋic qikiŋnepie sasec â sindaŋ irec kiŋaŋ qaqa ehame kosa jujumbieŋ, eme dameŋ ʒiŋuczia me sahac-ŋeŋic qikiŋnepie tiŋnere kiŋaŋ qaqa ehame maŋfuru erâ junʒepieŋ. 20 Sâqocnere kiŋaŋ qaqa jumbiŋko tiŋnere niŋgiŋ mi foŋarewec. 21 Eme dameŋ ira wemo fârine bâfuambiŋ? Fârine hotâckembiŋ irec ʒiŋuczia manapie miminehec eekac; eme irec faicnao hâmoc bâbâfuane fokac. 22 Dameŋ ʒiŋuczia ine sâqocnere niŋgiŋ ŋeŋgoroŋkeme Anuture kiŋaŋ qaqa embiŋ juŋgopieŋ, ehuc fârine maŋfuru rombiŋ â ʒâhec juju sanaŋ bâfuaniŋmu. 23 Sâqocnere furine hâmoc rozo, â Anutu aki anonoc-ticnere fârine ine Wofuŋ-nâŋec Jesu Kristo erao ʒuhuckehuc juju sanaŋ rozo.