10
Anutuzi kiŋ tatarare hata bâfuawec i Judaŋic jaŋe qikiŋnembiŋ
1 Qomâfâc-nane, Judaŋic âgofâc-nane biaŋkeniŋte maŋnanezi boc enareme Anutu irec numucneekopac. 2 Jaŋe Anutu kiŋaŋ qacneniŋte ʒoɋac ehuc jueŋgopieŋ i honeekopaczi mukopac. Erâ i hatane kâuc bahuc eeŋgopieŋ. 3 Jaŋe Anuturaonec kiŋfâsâc eere hata fokac i kâuc baeŋgopieŋte jaŋac tiŋke biaŋ eniŋte giene baeŋgopieŋ. Irec Anutu tiŋne rune mi dapecnembiŋ. 4 Ŋiczi mamanasiŋhec erâ kiŋfâsâc bâfuanaŋte Kristozi sâcmutâc dâŋte hata hebâzicke-nârewec.
5 Mose e dâŋ ʒiŋuc qâreŋkewec: “Ŋic moc e sâcmutâc dâŋte tiŋke biaŋ hata âteocmuzi juju bâfuaocmu.” 6 Á mamanasiŋte tiŋke biaŋ eere dâŋ ine kecʒiŋuc fokac: “Go maŋgezi ʒiŋuc mi muzemec: Mozi sambâŋko ferâ Kristo bawahaocmu, 7 me mozi hârâcko hurâ Kristo hâmokicne jaŋeraonec jowa wefuocmu?” 8 Iŋuc mâcne, tiri papiao kecʒiŋuc mukicne: “Miti i ʒoricko mi fokac, i mumugao â mamanagao râekicne.” I mamanasiŋte dâŋ ŋaza qazuc eeŋgopeneŋ irec mukicne. 9 Jesu e Wofuŋ-nane i mumugao foocmu â Anutuzi Jesu hâmockonec bâɋâre-narewec i mamanagao foocmu eme biaŋkerâ jucmu. 10 Maŋzi Jesu manasiŋkehuc kiŋfâsâc ezo, â miczi e mutaniŋkehuc biaŋkezo. 11 Eme irec hâcne miti papiao kecʒiŋuc qâreŋkekicne: “E manasiŋkeocmuzi mi qurutuaocmu.” 12 Judaŋic â Grikŋic bârâwiŋ mi eŋgopeneŋ, e mocjahazi Wofuŋ junâre-fâreekac, erâ wiac fuŋne fuŋne hezu henâreekac. 13 Irec hâcne ʒiŋuc mukicne: “Wofuŋte ʒâŋe riwaseckeocmuzi biaŋkerâ juocmu.” 14 Ririwasecke i e mi manasiŋkeeŋgopieŋzi wemocko eniŋmu? Anutu mamanasiŋke i dâŋticne mi manaeŋgopieŋzi wemocko eniŋmu? Anutu dâŋticne mamana i biŋe mumu tâmiric wemocko eniŋmu? 15 Á biŋe mumu i moczi jaza sorec mi ejarehame wemocko fuaniŋmu? Dâŋqâreŋ ʒiŋuc hâcne fokac: “Biŋebiaŋ mumuŋic jaŋere kike fânâŋzi maŋ baafec bâfuaekac.”
Anutuzi Judaŋic bâipiec-jopawec
16 Biŋebiaŋ ine ŋic gâcnezi mana rereŋ mi embiŋ. Jesajazi wâc ʒiŋuc muwec: “Wofuŋ, biŋedâŋ muhaŋnekicne i mozi mana ʒakiewec?” 17 Irec ʒiŋuc manazo: Mamanasiŋ i miti mu manacte fârine, â miti mu manac i Kristore micte fuaekac. 18 Hâc, eme ʒiŋuc muhuc wiokopac: Jaŋe miti mi manambiŋ me? Iŋuc mâcne,
“Micfânâŋ-jeŋiczi mâreŋ sâcke-fârewec
â dâŋjeŋiczi mâreŋ qaŋeŋnao fisiwec.”
19 Eme mocwâc wiohuc mukopac: Israe ŋic jaŋe mi mecne mana-hâmombiŋ? Iŋuc mâcne, qanaŋ Mosezi ʒiŋuc qâreŋkewec i mupe:
“No ŋic omane rocjopape siric-ŋopapie iiŋguuŋ ejarenʒepieŋ;
ŋicguru mutucne hefârec-jopape buŋeŋic gâpârezejec.”
20 Eme ʒâhec Jesajazi dâŋ bâutuckehuc kecʒiŋuc muwec:
“Mi basacnuhuc jumbiŋzi bâfuacnumbiŋ,
nore mi muhuc jumbiŋ jaŋe maic-jopapo.”
21 Erâ Israe ŋic jaŋere ine ʒiŋuc mu qâreŋ ewec: “No ŋicguru mana qâomane â mickobacne dameŋ ʒora meoric qajarehuc jupo.”