1 Go ine miti riucdâŋ fokac irec sâcko jaza mutâc ezemec. 2 Ehuc mutec ŋic kâcɋene jaŋe sowa bâtâc â metâne â wama ruaine jupie mamanasiŋ â maŋjauŋ â maŋuruc furu fojarezejec. 3 Erâ ŋokac kâcɋene iŋuc jaha jazatec miti ŋokac fârine erâ gupe micko âkec tâmiric â nârâmbe tâmiric juhuc juju biaŋte qaqazu enʒepieŋ. 4 Ehuc ŋokac socɋâri jaza mutâc epie ŋowe ɋiefâc-jeŋic jauŋ biaŋne ejarenʒepieŋ. 5 Erâ mimihec erâ sasec tâmiric juhuc nâ qofac â wiac bâpiaŋke emasaŋ ehuc ŋowefâc-jeŋic sâsec-jopanʒepieŋ. I Anuture dâŋ susure fuazacte iŋuc enʒepieŋ.

6 Ŋicmotec iŋuc jaha esoc-jopatec sowa bâtâc-jeŋichec junʒepieŋ. 7 Ehuc go gahac wiac biaŋne sasawa irec micne bajarehuc eehâmo gie batec honerâ bâjâpecgunʒepieŋ. Miti mutiŋnehuc â bâmâckehuc jazazemec. 8 Erâ hata sanaŋ fokac irec sâcko musaricketec kisâ jaŋere maŋ henʒaŋneme jaŋe burec enâreniŋte dâŋ basarâ behenʒepieŋ. 9 Kiŋaŋ qaqa jazatec bomboŋfâc-jeŋic jaŋere dâŋ reŋke-fârehuc kiŋaŋ biaŋne qajarenʒepieŋ, ehuc micjeŋicko mi ronʒepieŋ. 10 Erâ fiuc serereŋ tâmiric juhuc wiac-jeŋic hone qâzuc ehâmonʒepieŋ. Iŋuc ehuc bâbâpiaŋ-nâŋec Anutu dâŋticne ba eric ecneniŋmu.

11 Mâreŋ sâc ŋic biaŋkenaŋte Anuture aki anonoczi bâtâcne bâtimuŋ ewec. 12 Erâ izi bâfiriec-nâpohuc bâtiŋ-nâpohame qâpuc hata â wiac jawanere andac i qikiŋnerâ mâreŋ ʒira wama ruaine â tiŋne â mitine junʒepeneŋ. 13 Iŋuc juhuc Anutu sâko â bâbâpiaŋ-nâŋec Kristo Jesu ere eri tatamac fua tâcneme juju aŋacko fisinaŋte irec mamanac junʒepeneŋ. 14 Eki hâcne nâŋâcnere due bahuc sindaŋkonec bâhoc-nâpowec, erâ fuŋfuŋfâc-ticne juhuc mitire fârine ʒoɋac erâ bâfuanaŋte ʒure bâpiaŋ enârewec. 15 Go paŋʒâic erâ dâŋ i hâcne jazahuc mu sawaŋ â mu bâtiŋ ejarezemec. Ŋic jaŋe go mi hucgunʒepieŋ.