3
Yesu ye saekalili na kabo Mose
1 Kagu kahao yo louguwao, Yaubada yona tamowai, galewa yogana taulapuina doha yau, ya henuwa bena huya maudoina nuwamiu se lau Yesu unai. Iya ede ta hededegabae meta iya Yaubada yona hetahetamali tamowaina yo yoda taukaitalasam saesaena. 2 Iya nuwana ye tolekesegai taukaisunuwaina unai na yona paisowa ye ginauli gonogonowana doha Mose hinage yona paisowa ye ginaulikesegai Yaubada yona numa unai.* Numa ne, iya ede Isalaela tamowaidi heyaheyasonidi, na Mose iya kadi boda hesau. 3 Na Yesu hedebasae saesaena ye hai na kabo Mose, doha hinage numa namwanamwana tauginaulina hedebasae lakilakina ye hai na kabo numa ne. 4 Numa kesega kesega tauginaulidi udoiꞌudoi, na Yaubada ye bom ginauli maudoidi tauginaulidi. 5 Mose nuwana ye tolekesegai Yaubada yona numa paisowana unai, na iya meta heyayai tauhaina mo. Yona paisowa wa meta saha kabo Yaubada huya matadawai ye hemasalahadi ne tautaudi. 6 Na Keliso nuwana ye tolekesegai Yaubada unai, na iya Yaubada natuna yo yona numa taukitahetetena. Numa ne iya ede kita, ena ta tolokesegai na yoda sunuma ta tole Yaubada yona hededehesunuma udiyedi yo ma nuwabayaoda ta hedehededehemasalahadi tamowai udiyedi.
Hedehedede bayabayaona ye lau taukawayagala udiyedi
7 Unai Yaluwa Tabuna yona hedehedede bena kwa lapui, doha ye wane,
“Teina mayadai ta unai ena kalinana kwa lapui,
8 tabu nuwamiu kwa hekwailolodi iya unai,
doha Isalaela tamowaidiyao se tolodagedagelaei huyana Yaubada se laukita balabala unai.
9 Temenai kami mumugao yogu kabinamwa kalidiwai bolimai 40 luwadiwai se kitadi
na sola yodi laulau yo yodi miyamiya ta udiyedi se hekohekoipiligau.
10 Unai tenem isi ne ya koipiliyeidi
na ya wane, ‘Siya huya badobado nuwadi se toletolehesuwaladi kaliguwai.
Saha ya hedede bena se ginaulidi wa se kawayagalaei.’
11 Unai ede yogu kouyalayala unai ya hededekaigwala,
‘Taba nige yogu kabakaiyawasi magaina* Yaubada yona huyahedede wa unai, teina hedehedede ta kabakaiyawasi magaina kaniyona ede Kanana. Hebelu 4:3 yo 4:6 udiyedi buka ta taukulina wa kabo kabakaiyawasi magaina ye heyaheyasoniyei galewa unai. unai se lusola.’ ” (Same 95:7-11)
12 Bena kwa kitanamwanamwa, kagu kahao yo louguwao. Kwa kitaheteteꞌuyoigomiu tabu nuwamiu se yababa yo se labulabui, yo tabu Yaubada Maumaulina kwa nuwagabaei. 13 Komiu ma kami kahao bena kwa haihedehededehebayaoꞌuyoigomiu mayadai kesega kesega udiyedi. Na teina mayadai kesega kesega Yaubada ye katai “teina mayadai ta”. Unai kabo taba nige yababa ye lupoigomiu na nuwamiu se kwailolo Yaubada unai. 14 Ena nuwada ta tolekesegai Yaubada unai ye lau ee yoda huya kana siga yo ta tolobayao yoda sunuma unai doha huya bagubagunana yoda nuwabui mayadaina wa, kabo ta hemala Keliso kana kahao yo lounao mamohoidiyao. 15 Na tabu teina hedehedede bayabayaona ta nuwamiu se luluhidi:
“Teina mayadai ta unai ena kalinana kwa lapui,
tabu nuwamiu kwa hekwailolodi iya unai,
doha Isalaela tamowaidiyao huyana se tolodagedagelaei.” (Same 95:7-8)
16 Na tamowai Yaubada kalinana se lapui na iyamo se kawayagalaei wa, siya kaiteyadi? Siya ede Aikupito unai Mose ye woyahepesadi wa. 17 Kaiteyadi bolimai 40 luwanawai Yaubada se hekouyalayala? Tamowaidiyao ne meta se yababa na balabala unai se boita. 18 Yo siya kaiteyadi Yaubada ye hetahetaladi yo ye hededekaigwala meta taba nige yona kabakaiyawasi magaina unai se lusola? Siya ede taukawayagalaena wa. 19 Unai ta nuwatulobai meta siya taba nige se lagelau Yaubada yona kabakaiyawasi magaina wa unai, matawuwuna nige se kawamamohoi.
*3:2: Numa ne, iya ede Isalaela tamowaidi heyaheyasonidi, na Mose iya kadi boda hesau.
*3:11: Yaubada yona huyahedede wa unai, teina hedehedede ta kabakaiyawasi magaina kaniyona ede Kanana. Hebelu 4:3 yo 4:6 udiyedi buka ta taukulina wa kabo kabakaiyawasi magaina ye heyaheyasoniyei galewa unai.