14
Pariaq Thê Cađac Dèh Tôiq Lôi
1 Ô Is-ra-ên, wìh hlài ta Chuaq Boc Plình ìh beq,
taiq tôiq lôi ìh broq ca ìh tacro.
2 Pì waiq khàn dang xìn
wa wìh hlài ta Chuaq beq.
Doi ca Haq bàu cô:
“Xìn cađac rìm bìac ngang dù nhèn con,
wa nhàn hlài nhèn xam manoh xa-ŏch,
đòiq nhèn con jah dèch bàu manè apôi ti blìa hacùng nhèn.
3 A-si-ri ùh jah dèch dŏih nhèn,
nhèn ùh còi hòm axêh tajêh;
dua 'mù tì nhèn khoi broq, nhèn pi anoi hòm: ‘Pì raq Boc Plình nhèn,’
ma jah 'màng aih toq ŏi ta ìh raq,
èh mangai ma lac jah Ìh xa-ŏch!”
4 Au jah broq brêh bìac blàq blènh da wì haq.
Au xa-ŏch ca wì haq dìq ca jaq;
ma jah 'màng aih can nòih da Au khoi wia khoi ca wì haq.
5 Au jah tìah ca diac ngom am ca Is-ra-ên;
wì haq jah loh riang tìah ca riang tacreo,
wa grap riah tìah ca long hùang nam ta Liban.
6 'Bài hamenh nga da haq jah hlàng loh hangai;
can lem da haq tìah ca can lem da long ôliu,
hòi xua thùm da haq tìah ca hòi xua thùm da long hùang nam ta Liban.
7 Wì ma rìh ŏi ti yàp long haq,
jah broq loh 'mau hòm;
jah loh riang tìah ca long nho.
Tìang 'bang haq jah loh càn tìah ca alac nho Liban.
8 Ô Ep-ra-im, Au jah i bìac cleq ca 'bài dua 'mù 'mòh?
Au raq khoi rùp bàu wèq ngan ìh.
Au tìah ca long preo ma jìang;
nhò Au ma ìh jah i plì.
9 Mangai leq rabiaq chaq loq bìac cô beq!
Mangai leq ragài chaq loq bìac aih beq!
Ma jah 'màng aih 'bài trong da Chuaq tajang;
'bài mangai rìh ta-atoq jah cadiang lam ta aih,
mahaq 'bài mangai broq tôiq èh tacro ta aih.