64
Xìn Dèch Khoi ca Mangai Git Hlèp
Đawit Achìh
1 Ôi Boc Plình, xìn tamàng bàu dang xìn da au,
wèq ban au claih khoi ca mangai ma tagit ca au.
2 Xìn Ìh cadoc au hlèp ca bìac hatình da mangai dù,
khoi ca mangai bàc broq bìac ngang dù.
3 Wì calenh rapet tìah ca calenh chang gùm.
Wì caprôh bàu capoch ngang dù tìah ca penh panenh,
4 mot ta nòi hlèp penh mangai ta-atoq;
wì penh mahaq ùh yùq crè cleq.
5 Wì parông dabau ta bìac dù dađeh,
hatình ca dabau đòiq broq hlàp nòi hlèp,
wì hèm: “Ùh i cabô hnoq.”
6 Wì haq ti chaq bìac dù, èh doi:
“Bèn khoi hatình broq pađim dìq jaq lem.”
Bàu wa manoh hèm enh dalam da con mangai dìq jaq 'mèq 'mac.
7 Mahaq Boc Plình penh panenh ca wì haq,
ta'ngàc wì loh habau.
8 Chuaq jêh đac wì haq,
taiq rapet wì haq tajraq hlài ca cla wì haq;
rìm ngai hnoq wì haq dìq ngu ngìu gàu.
9 Èh dìq ca mangai yùq crè wa anoi 'noh bìac da Boc Plình,
wa hèm haboq ca bìac Haq khoi broq.
10 Mangai ta-atoq jah lem bùi ŏi ta Chuaq,
hi khoi mùt nòi hanình ca Haq,
mangai i manoh lem jang jah calêu hiniq Chuaq.