118
1 ܫܲܟܪܘܼܢ ܠܡܵܪܝܵܐ ܣܵܒܵܒ ܛܵܒ݂ܵܐ ܝܠܹܗ،
ܣܵܒܵܒ ܠܥܵܠܲܡ ܝܼܠܵܗ̇ ܛܲܝܒܘܼܬܹܗ.
2 ܐܵܡܹܪ ܐܝܼܣܪܵܐܹܝܠܔ:
”ܠܥܵܠܲܡ ܝܼܠܵܗ̇ ܛܲܝܒܘܼܬܹܗ.“
3 ܐܵܡܪܝܼ ܒܹܝܬ ܐܲܗܪܘܿܢ:
”ܠܥܵܠܲܡ ܝܼܠܵܗ̇ ܛܲܝܒܘܼܬܹܗ.“
4 ܐܵܡܪܝܼ ܙܕܝܼ̈ܥܹܐ ܕܡܵܪܝܵܐ:
”ܠܥܵܠܲܡ ܝܼܠܵܗ̇ ܛܲܝܒܘܼܬܹܗ.“
5 ܡ̣ܢ ܐܘܼܠܨܵܢܝܼ ܩܪܹܐ ܠܝܼ ܠܡܵܪܝܵܐ،
ܩܵܡ ܓ̰ܲܘܸܒ ܠܝܼ ܘܡܲܬܸܒ݂ ܠܝܼ ܒܪܘܵܚܵܢܝܼ ܡܵܪܝܵܐ.
6 ܡܵܪܝܵܐ ܥܲܡܝܼ ܝܠܹܗ، ܠܹܐ ܙܵܕܥܹܢ؛
ܡܘܼܕܝܼ ܡܵܨܹܐ ܥܵܒܹܕ ܐܸܠܝܼ ܒܲܪܢܵܫܵܐ؟
7 ܡܵܪܝܵܐ ܥܲܡܝܼ ܝܠܹܗ ܠܗܲܝܘܼܪܝܼ،
ܘܐܵܢܵܐ ܒܸܬ ܚܵܙܹܝܢ ܙܵܟ݂ܘܼܬܵܐ ܠܣܵܢܝܵܢܝܼ̈.
8 ܒܘܼܫ ܨܦܵܝܝܼ ܝܠܵܗ̇ ܠܸܫܩܵܠܵܐ ܓܵܘܣܵܐ ܒܡܵܪܝܵܐ،
ܡ̣ܢ ܠܸܣܒܵܪܵܐ ܒܒܲܪܢܵܫܵܐ.
9 ܒܘܼܫ ܨܦܵܝܝܼ ܝܠܵܗ̇ ܠܸܫܩܵܠܵܐ ܓܵܘܣܵܐ ܒܡܵܪܝܵܐ،
ܡ̣ܢ ܠܸܣܒܵܪܵܐ ܒܢܲܨܝܼܚܹ̈ܐ.
10 ܟܠܵܝܗܝ ܐܸܡܘܵܬܹ̈ܐ ܟܪܝܼܟܸܢܗܘܿܢ،
ܒܫܸܡܵܐ ܕܡܵܪܝܵܐ ܒܸܬ ܩܵܛܥܹܢܗܘܿܢ.
11 ܩܵܡ ܟܵܪܟ݂ܝܼ ܠܝܼ، ܗܹܐ، ܟܪܝܼܟܸܢܗܘܿܢ،
ܒܫܸܡܵܐ ܕܡܵܪܝܵܐ ܒܸܬ ܩܵܛܥܹܢܗܘܿܢ.
12 ܩܵܡ ܟܵܪܟ݂ܝܼ ܠܝܼ ܐܲܝܟ݂ ܕܵܒܵܫܹ̈ܐ،
ܐܝܼܢܵܐ ܟ̰ܡܝܼܥ ܠܗܘܿܢ ܐܲܝܟ݂ ܢܘܼܪܵܐ ܕܟܸܬܘܹ̈ܐ،
ܒܫܸܡܵܐ ܕܡܵܪܝܵܐ ܒܸܬ ܩܵܛܥܹܢܗܘܿܢ.
13 ܚܲܪܙܘܼܦܹܐ ܩܵܡ ܚܲܪܙܸܦܸܬ ܠܝܼ ܕܢܵܦܠܹܢ،
ܐܝܼܢܵܐ ܡܵܪܝܵܐ ܗܘܼܝܸܪܹܗ ܐܸܠܝܼ.
14 ܥܘܼܫܢܝܼ ܘܙܡܵܪܬܝܼ ܡܵܪܝܵܐ ܝܠܹܗ،
ܘܗܘܹܐ ܠܹܗ ܐܸܠܝܼ ܦܘܼܪܩܵܢܵܐ.
15 ܩܵܠܵܐ ܕܫܘܼܒ݂ܚܵܐ ܘܕܦܘܼܪܩܵܢܵܐ ܓܵܘ ܡܲܫܟܢܹ̈ܐ ܕܙܲܕܝܼܩܹ̈ܐ،
ܝܲܡܝܼܢܵܐ ܕܡܵܪܝܵܐ ܥܵܒ݂ܕܵܢܬܵܐ ܕܚܲܝܠܵܐ،
16 ܝܲܡܝܼܢܵܐ ܕܡܵܪܝܵܐ ܪܝܼܡܬܵܐ ܝܠܵܗ̇،
ܝܲܡܝܼܢܵܐ ܕܡܵܪܝܵܐ ܥܵܒ݂ܕܵܢܬܵܐ ܕܚܲܝܠܵܐ.
17 ܠܹܐ ܡܵܝܬܹܢ ܐܸܠܵܐ ܒܸܬ ܚܵܝܹܝܢ،
ܘܒܸܬ ܗܲܩܹܝܢ ܥܒ݂ܵܕܹ̈ܐ ܕܡܵܪܝܵܐ.
18 ܬܲܥܠܘܼܡܹܐ ܬܘܼܥܠܡܸܢܹܗ ܡܵܪܝܵܐ،
ܐܝܼܢܵܐ ܠܡܵܘܬܵܐ ܠܵܐ ܣܘܼܦܝܸܢܹܗ.
19 ܦܬܘܿܚܘܼܢ ܐܸܠܝܼ ܕܲܪ̈ܘܵܙܹܐ ܕܙܲܕܝܼܩܘܼܬܵܐ،
ܕܥܵܒ݂ܪܹܢ ܒܝܼܵܝܗܝ ܘܫܲܟܪܸܢ ܠܡܵܪܝܵܐ.
20 ܐܵܗܵܐ ܝܠܹܗ ܕܲܪܘܵܙܵܐ ܕܡܵܪܝܵܐ،
ܙܲܕܝܼܩܹ̈ܐ ܒܸܬ ܥܵܒ݂ܪܝܼ ܒܝܼܹܗ.
21 ܒܸܬ ܫܲܟܪܸܢܘܼܟ݂ ܕܩܵܡ ܓ̰ܲܘܸܒܸܬ ܠܝܼ،
ܘܗܘܹܐ ܠܘܼܟ݂ ܐܸܠܝܼ ܦܘܼܪܩܵܢܵܐ.
22 ܟܹܐܦܵܐ ܕܡܘܼܣܠܹܐ ܠܗܘܿܢ ܒܲܢܵܝܹ̈ܐ
ܗܘܹܐ ܠܹܗ ܠܪܹܝܫܵܐ ܕܩܘܼܪܢܝܼܬܵܐ،
23 ܡ̣ܢ ܠܟܸܣ ܡܵܪܝܵܐ ܗܘܹܐ ܠܵܗ̇ ܐܵܗܵܐ،
ܗ̇ܝ ܥܘܼܓ̰ܵܒܵܐ ܝܠܵܗ̇ ܒܥܲܝܢܲܢ̈.
24 ܐܵܗܵܐ ܝܠܹܗ ܝܵܘܡܵܐ ܕܥܒ݂ܝܼܕ ܠܹܗ ܡܵܪܝܵܐ،
ܦܵܨܚܲܚ ܘܚܵܕܲܚ ܒܝܼܹܗ.
25 ܦܲܪܦܘܼܠܹܐ ܝܘܲܚ، ܝܵܐ ܡܵܪܝܵܐ، ܦܲܪܸܩ ܠܲܢ،
ܦܲܪܦܘܼܠܹܐ ܝܘܲܚ، ܝܵܐ ܡܵܪܝܵܐ، ܡܲܢܬܝܼ ܠܲܢ.
26 ܒܪܝܼܟ݂ܵܐ ܝܠܹܗ ܗ̇ܘ ܕܒܹܐܬܵܝܵܐ ܝܠܹܗ ܒܫܸܡܵܐ ܕܡܵܪܝܵܐ،
ܩܵܡ ܒܲܪܟܲܚ ܠܵܘܟ݂ܘܿܢ ܡ̣ܢ ܒܲܝܬܵܐ ܕܡܵܪܝܵܐ.
27 ܐܲܠܵܗܵܐ ܡܵܪܝܵܐ ܝܠܹܗ، ܘܒܘܼܗܪܸܢܹܗ ܐܸܠܲܢ،
ܐܣܘܿܪܘܼܢ ܙܵܘܚܵܐ ܒܝܲܕ ܦܲܥܘܵܢܹ̈ܐ ܗܲܠܔ ܩܲܪ̈݇ܢܵܢܹܐ ܕܡܲܕܒܚܵܐ.
28 ܐܲܠܵܗܝܼ ܝܘܸܬ ܐܲܢ݇ܬ، ܘܒܸܬ ܫܲܟܪܸܢܘܼܟ݂،
ܐܲܠܵܗܝܼ ܝܘܸܬ ܐܲܢ݇ܬ، ܘܒܸܬ ܡܲܪܡܸܢܘܼܟ݂.
29 ܫܲܟܪܘܼܢ ܠܡܵܪܝܵܐ ܣܵܒܵܒ ܛܵܒ݂ܵܐ ܝܠܹܗ،
ܣܵܒܵܒ ܠܥܵܠܲܡ ܝܼܠܵܗ̇ ܛܲܝܒܘܼܬܹܗ.