8
Yesus na a grandomri fu a nyun ferbontu
1 A moro prenspari sani fu san wi e taki na tak' wi abi sowan grandomri di e sidon na a let'anu sei fu a kownusturu fu a Bigi Gado na heimel. * Ps 110:1 2 A e du a wroko ini a Santa Presi, ini a trutru Santa Tenti di a no libisma meki, ma di Gado srefi meki.
3 A wroko fu ibri grandomri na fu tyari presenti nanga offer gi Gado. Fu dat'ede a ben de fanowdu tu tak' a Grandomri disi ben abi wan offer fu tyari. 4 Efu A ben de na grontapu, dan A no bo de wan domri srefsrefi, bika sma de kba di e tyari offer soleki fa a wèt e taki. 5 Ma a Santa Tenti pe den e du a wroko na wan prentyi nanga wan eksempre nomo fu a wan di de na heimel. Di Moses bo meki a Santa Tenti, Gado taigi en taki: “Sorgu tak' yu meki ala sani leki a eksempre san Mi sori yu tapu a bergi.” * Ex 25:40
6 A wroko di Yesus kisi fu du now leki domri, moro hei. Bika En de a Mindriman fu wan moro bun ferbontu di abi moro bun pramisi. 7 Bika efu noti no ben mankeri na a fosi ferbontu, dan a di fu tu no bo de fanowdu. 8 Ma fu di Gado ben feni fowtu na den sma fu En, A taki:
Masra e taki:
Luku, wan ten o kon,
pe Mi o meki wan nyun ferbontu
nanga a pipel fu Israel
èn nanga a di fu Yuda. * Jer 31:31-34
9 A no sa de leki a ferbontu
di Mi ben meki
nanga den afo fu den,
na a ten di Mi ben langa anu
gi den,
fu puru den na Egiptekondre.
Bika den no hori densrefi
na Mi ferbontu,
dan Mi drai Mi baka gi den.
Na so Masra e taki.
10 Masra e taki: Disi na a ferbontu
di Mi o meki
nanga a pipel fu Israel
baka den dei dati:
Mi o poti den wèt fu Mi
na ini den prakseri,
èn Mi o skrifi den poti
na ini den ati.
Mi o de den Gado,
èn den sa de Mi pipel.
11 A no sa de fanowdu moro
tak' wan sma e taigi en kondreman
noso en brada taki:
“Yu mus kon leri sabi Masra.”
Bika ala sma sa sabi Mi,
bigin fu den pikinwan
kon miti den bigiwan.
12 Bika Mi o gi den pardon
fu den ogri di den du,
èn Mi no sa memre
den sondu fu den moro.
13 Efu Gado taki fu wan nyun ferbontu, dan A taki tak' a fosi wan kon owru. Èn efu wan sani de langa kba èn a kon owru, dan pikinso ete èn a no o de moro.