1 Aha/ mina kar /e ki ca mo, ayy Tap̱a, haali/ /e ’de’kki aha/ ki mis mo,

dhali /e diki dhal uni gwansan bway mo kun ta ’kup̱ ki aha/ mo mmo’kuny bwa ap̱o/ aha/ mo.

2 Ayy Tap̱a Arumgimis pem, aha/ gwona ’twa/ e /e gom mowoṯẖ mo,

dhali /e wac̱ki aha/ mo be.

3 Ayy Tap̱a, /e ’cwamkina aḵashiram pem ’pena Haawiya mo,

dhali war aha/ mondiki/em pem is mo ’peni bwaman uni gwansan kun iikin ka luŋgu’b e jisa ’kulga/ mo.

4 Yuḵi gway mmomaŋ Tap̱a mo, ayy um piti kun dhunu ki she/ ki dhelel dhelel mo,

dhali c̱iyi a’borim bwa i is gom gway piti jin ḵogu mo,

5 Haali/ anyor piti di’d mo hili jasi gom ari mo mo,

dhali mii ma ’them piti a’di di’d ki sule/ sule/ mo.

Ko jin gwonu a’di midi di gom mon’thiny mo tani

hili moŋ’kuny bwa a’di p̱u’dki’d mon’thamo/ mo be.

6 Haali/ me’d aha/ mo tani aha/ ona gwo e mom pem jin isha to ka enthus mo ki:

Aha/ minu ’koki joc̱ ki sule/ mo.

7 Ki mii ma ’them pini mo, ayy Tap̱a,

/e ṯelki aha/ sho’k mo me’d ’kuwosha turga/ jin ’bitha’bi’th mo.

/E bagki jis/em pini mo tani dhali aha/ merkina mo.

8 E /e mo tani ayy Tap̱a, aha/ gwokina mo

dhali e Tap̱a mo tani aha/ karkina mo jin di’buwa di’b is mo.

9 To wakata midi ’dap̱ e mowum pem mo

waḵki/ aha/ yana ka ’cesh e jisa ’kulga/ mo?

A/dhali mina bu’da ’ceshi maŋ /eya?

A/dhali mina a’di iṯor mom pini jin tana /e a/isiŋ gana/ mowa?

10 Ciḵi gwo mo ma, ayy Tap̱a, dhali miiyi mii ma ’the gom aha/ mo.

Ayy Tap̱a, wari /e ka manwoṯẖ aha/ mo ma.

11 /E ṯu’kki moŋkom pem ki mo jin p̱eka/ imis mo.

Dhali /e ’cuḵki aha/ burrinyen shawaal mo

dhali ’kam aha/ ki moŋ’kuny bwa mo,

12 ka ḵashiram pem midi maŋ /e mo dhali diki di ki shwamm mo.

Ayy Tap̱a Arumgimis pem mo, aha/ mina c̱i /e mo jin ’boruwa ’bor bwa i is ki sule/ sule/ mo.