1 Tap̱a a’di ijiki’da ji mo. Dhalki ’kwani deen ki bir bir mo.

A’di c̱a’bki’d eya ḵursi ma Maliḵ eya p̱owa c̱arabiim mo. Dhalki mony’cesh theḵ she/ mo.

2 Tap̱a a’di caaca eya Sihyuun mo.

A’di ikarkunu ki ca ap̱owa ris ’kwani ’baar mo.

3 Dhalki ’kwani maŋ gway pini mo jin caaca mo dhala purem pini mo.

A’di iḵogu mo.

4 Maliḵ a’di c̱a’bki dem dem mo, a’di jin enki mo ma ḵar/e mo.

/E ṯelki mo jin daru gi mii ma dehe/ sho’k mo.

/E ki tor gwowa bora ’cesh gom mii ma ḵar/e mo

dhali mo ma ḵar/e goma Yakuub mo.

5 Kari Tap̱a Arumgimis bana ki ca mo.

Luŋi a’di e cwam piti jin dhuna a’di sho’k mo.

A’di iḵogu mo.

6 Musa dhala Haruun uni ita kum piti ibwaman ma gasiis mo.

Samu/iil si’da/ a’di ita jim piti e bwaman uni gwansan kun yuḵki gway piti mo.

Uni ki ko ’twa/i Tap̱a mo tani dhali a’di ithoḵki uni gwo mo be.

7 A’di ṯorki uni gwo ka raḵ jin wana e ka ḵa’dum ki jamas piti mo.

Uni dhuki gwonyc̱im piti mo,

dhali gwoŋḵan piti kun bahu mo kun c̱ikina a’di uni mo.

8 Ayy Tap̱a Arumgimis bam /e thoḵki uni ’twa/ mo.

/E tana Arumgimis jin gwamki uni mo,

hili /e ki ri’c uni gom tonthus buni jin thama uni mii mo.

9 Kari Tap̱a Arumgimis bana ki ca mo,

dhali luŋi a’di e ’kuwosha turgam piti jin ḵogu mo,

haali/ Tap̱a Arumgimis bana mo tani a’di ḵogu mo.