1 Ca rizë́ ládxiʼbaʼ bidxinaʼ guixiʼ nisa yégudoʼ,

lëscaʼ caní rizë́ ládxaʼa Liʼ, Dios.

2 Ribidxi ládxaʼa Liʼ cazuʼ, Dios.

¿Bátaxi udxinaʼ ga dë quiaʼ, en tsuʼa le yúbölö yudoʼ láʼayi quiuʼ?

3 Rëla, en te dza ribödxaʼ, en bitiʼ bi rahuaʼ.

Yuguʼ dza nacuáʼ nupa taʼnábini nedaʼ, taʼnná: “¿Gazxi caz zoa Dios quiuʼ?”

4 Risëbi ládxaʼa cateʼ röjnedaʼ ca guca zíʼalö,

cateʼ guzáʼlenaʼ bönachi guizxi yu, en yöjnö́ruaʼ láhuilöguequi raʼ yuʼu queëʼ Dios.

Lu yöl-laʼ rudzeja queë́tuʼ bíl-latuʼ, en guyéaj ládxiʼtuʼ-nëʼ Xanruʼ, en bentuʼ laní.

5 ¿Bizx que risë́bidaʼ ládxaʼa, en bizx que röʼa böniga?

Uzxöni ládxaʼa-nëʼ Xanruʼ Dios, tuʼ huadxín dza cuʼa-nëʼ yöl-laʼ ba le yúbölö.

Náquiëʼ Nu rusölá nedaʼ, en náquiëʼ Dios quiaʼ.

6 Risë́bidaʼ ládxaʼa, Dios quiaʼ.

Que lë ni naʼ tsöjnedaʼ Liʼ tsanni ni zoaʼ, ridáʼ rizxúnnajaʼ raʼ yegu Jordán,

en tsanni ni ridáʼ lu guíʼa Hermón, en lu guíʼa Mizar.

7 Ca tu guziúʼ rinnë́ lu nísadoʼ, en ca bö ruíʼi tu budoáʼ nísadoʼ queëʼ Dios,

caní rinnë́ ladxiʼ böʼ naca cazaʼ lu yöl-laʼ risëbi ladxiʼ.

8 Rinábidaʼ-nëʼ Xanruʼ huéchiʼ ládxëʼë nedaʼ yuguʼ dza.

Yuguʼ dzöʼ rul-laʼ yöl-laʼ ba queëʼ Lëʼ,

en rulidzaʼ Dios, ruíʼilenaʼ-nëʼ didzaʼ, Nu naʼ runna quiaʼ yöl-laʼ naʼbán.

9 Guíaʼ-nëʼ Dios, Nu ruzóa nedaʼ tsutsu, inníaʼ: ¿Bizx que nál-la ládxuʼu nedaʼ?

¿Bizx que run bayúdx quíʼi sácaʼticaʼsaʼ lu náʼagaca nupa bitiʼ taʼléʼe nedaʼ dxiʼa?

10 Rutsaba yúguʼtë dxita yuʼa tuʼ tuʼdidzaʼ yudxi nedaʼ.

Yuguʼ dza taʼnábini nedaʼ, taʼnná: “¿Gazxi caz zoa Dios quiuʼ?”

11 ¿Bizx que risë́bidaʼ ládxaʼa, en bizx que röʼa böniga?

Uzxöni ládxaʼa-nëʼ Xanruʼ Dios,

tuʼ huadxín dza cuʼa-nëʼ yöl-laʼ ba le yúbölö,

tuʼ náquiëʼ Nu rusölá nedaʼ, en náquiëʼ Dios quiaʼ.