Sam Kranzpnu-tq-nrade-esz'mz (36)
Brti Drtwrnge Kx Sa Na-aovxioq Kxdrka'-ngrng
Nabz ne Devet, kxnzawz ne Yawe.
1 Gct, nzmncngr kxtrka vzdz-zvzm mz nabz kxdrka'-ngrng,
X sc tqrpipebzle badr kx, “Bzkq amrlueamu Gct.” ✡ Rom 3:18
2 X batrpzle nzglqpx-lzbq-krdr.
Murde nzrpilr trmcwq alwx rdrng x trna-ayrplapxwq nidr.
3 Natqdr trka-esz'ngr x yctr-ngrpwz nzpokiangr.
Delc trtxpnzngr nzale-krdr da kxmrlz x tubq.
4 Mz nrlckxbq sc tzaoti drtwrdr nzryrlq-krdr drtwr kxtrka.
Nzpxtxpx-ngrdr nzti kxtubq mz nzmrlzkr badr lrpzki kx vz-rbr.
5 Yawe, nzmyatxlzkr nzaodu-zvz-krm
X nzangidati-zvz-krm natqm nzkrlzlzlr bongavz. ✡ Sam 57:10; 71:19; 103:11; 108:4
6 Nztubq-krm vzdz krlzbzle newz kxnzmyalzng, x vzo kz la me boongr.
Murde aclve-zpwxq leplz x animol mz nzrsakrlrngr.
7 Gct, nzaodu-krm leplz mrlz-zlwzm bagr,
Murde apusr-ngrm nigr nei kio kcng tzwxbulvzong lxedr.
8 Mz nzrka-zvz-krme nagr dakxnzng, dakxnzng lcng yctxpxng zvz.
Murde avzo-zvzme zmrlz ngrm bagr, apule lue kc tqyrletx alo.
9 X nim narlue r nzlu-krgr,
Kc tqapu-zvzmle bagr nzyrlelz-krm aulz.
10 Yawe, navz zvz nzaodu-krm nigr kcng tzvz-nqblqlr nim,
Mz nzamrlz-krm kx nabzdr tubq.
11 Bzkq rlrpx-ngrn mq kxdrka'-ngrng nzlolvz-krdr ninge,
X kxnzglqpx-lzbqng bzkq nanycdr nzrnzlvzolr ninge.
12 Murde brti drtwrnge nzaovxio-krm kxdrka'-ngrng.
X mz nztao-krdr, trpengr nztulz-mou-krmlr.