Sam Kranzpnu-rpwxmz-nrade-rpwxmz (99)
Na-angioku Yawe, King Kc Tqtr-esz'ngr
Naglqlzku Drtqde
1 Yawe nide King, kx myaszlzle enjrl kcng tzmatqng tztu-ngalelvzlr tron nyzde.
X leplz amrlx mz nrlc tulvzo narnrcti-lzbqtr-ngrbzlr bade.
2 Yawe matq-esz'ngr Jerusalem.
X nzmyalz-esz'ngr-krde myaszpxle lr mrkzbleng amrlx.
3 Leplz amrlx naglqlzlr drtqde,
Murde nide kc tqtr-esz'ngr.
Naglqlzku Gct Rgu
4 King kc tqrninr, mrlz-zvzbz bam da kxmrlz.
Delc nzaclve-zvz-krm nigr tqtubq-zvz-ngrde x rsakrlrngr.
5 Nayrngzobzku mz nanyc Yawe,
Mrkc tqwxbu-ngrde mz tron nyzde.
Na-angioku x naglqlzku Gct rgu,
Murde nide kc tqtr-esz'ngr.
Naglqlzku Yawe
6 Mosis x Eron nidr pris neng Yawe, x profet Samwel krka'bz bade.
Nzyrnitrpzng bade x ayzlubzle natqdr.
7 Ycmnepxm badr mz nabz dcbz,
X nzvz-nqblqlr natqde x lou scdeng amrlx.
8 Yawe, nim Gct rgr,
X ayzlume natqgr, nigr leplz nemqng.
Kxmule-esz' ayrplapx-kaiq nigr mz alwx ngrgrng,
A' sc tqaelwapxpe-ngrn kx nim Gct kx krlzle nzipq-krde leplz.
9 Naglqlzku Yawe, Gct rgu, mz nzangio-krgu nide mz newz kxtr nyzde,
Murde nide kc tqtr-esz'ngr.