15
Maleknama ayopoi ne yeltood ayopoi la yela
1 Ka m lem nye bunnyaluŋ titaꞌar siꞌa line a zanbin n be arazana ni. Ka li a maleknama ayopoi ne yeltood ayopoi. Bama a yeltood bane kpelim nyaꞌaŋ la, bozugo ba yaꞌa ti naae, Winaꞌam supeen la me na ti naae.
2 Ka m nye siꞌel line wen wuu moꞌar line a nyain wuu gotiŋ ne, ka gendig ne bugum. Ka m lem nye bane zabi nyaŋ bunyua la ne o win ne o yuꞌur kal la, ka ba ziꞌeni kpiꞌe moꞌar la mor kona dine ka Winaꞌam tisi ba la ba nuꞌusin, 3 ka yuꞌum Winaꞌam tumtum Moses ne Peꞌebil la yuuma ye,
“Zugsob Winaꞌam titaꞌar,
fune tum tuumtitada ne tuumnyalima.
Fune a buudi wusa naꞌab,
ka fu tuuma sueya a suꞌum ne sida.
4 Zugsoba, fun gullim a suꞌum,
anoꞌone ku zo fu dabiem ka zunꞌe fu yuꞌure?
Buudi wusa na kena n zunꞌe fu,
bozugo fu popielim tuuma la nie paalo ni.”
5 Neꞌeŋa nyaꞌaŋ ka m gosi nye ka arazana puꞌusum yir la yoꞌog, ka fuug doog line paꞌan Winaꞌam beilim la be anina. 6 Ka maleknama ayopoi bane mor yeltood ayopoi line kpelim nyaꞌaŋ la, yi puꞌusum yin la na ye fupiela bane a nyain, ka salima senbidis loo ba nyoꞌod. 7 Ka bunvoeya anaasi la yinni nok salima laas ayopoi line ka Winaꞌam one be saŋa line kaꞌ ben la supeen peꞌeli ba ni la tis maleknama ayopoi la. 8 Ka Winaꞌam naꞌasi ne o paŋ peꞌel puꞌusum yir la wenne nyoꞌos ne. Ka soꞌ daa ku tunꞌe kpenꞌ li nii, asee saŋkan ka yeltood ayopoi bane ka maleknama ayopoi mor la ti naae.