5
Ri jubotaj wuj nacꞌom rucꞌ wukub sellos
1 Xinwil jubotaj wuj* “Jubotaj wuj”: Quil “rollo” pa vocabulario. cꞌo pukꞌab uwiquikꞌab ri Jun tzꞌul chupa ri tzꞌulibal re takanic. Ecꞌu wa jubotaj wuj cꞌo tzꞌibital chupa y chirij, yey nacꞌom rucꞌ wukub sellos. 2 Xinwil cꞌu jun ángel lic cꞌo uchukꞌab xsiqꞌuin che ubiꞌxiquil: «¿China ri yaꞌtal che cuquir uwach ri jubotaj wuj y culochꞌij ri sellos cꞌo che?» xchaꞌ. 3 Yey na jinta ne junok chilaꞌ chicaj o che ruwachulew o chuxeꞌ ulew yaꞌtal che culochꞌij ri sellos nacꞌom che ri jubotaj wuj re carajilaj uwach o tob ne xa re carilo. 4 Ecꞌu riꞌin lic quinokꞌic, ma na jinta junok rikom yaꞌtal che cuquir uwach ri jubotaj wuj re carajilaj uwach o tob ne xa re carilo. 5 Cꞌo cꞌu jun chique ri veinticuatro nimak winak, jewaꞌ xubiꞌij chwe:
—Matokꞌ chic, ma e ri Jun Coj re ri tinamit Judá, ri ralcꞌoꞌal can ri rey David, ri uchꞌijom uchukꞌab ronoje ri na utz taj, yaꞌtal cꞌu pukꞌab Rire culochꞌij ri sellos y cuquir uwach ri jubotaj wuj —xchaꞌ.
6 Tecꞌuchiriꞌ xinwilo, chwach ri tzꞌulibal re takanic y chiquixoꞌlibal ri cajib cꞌo quicꞌaslemal pachaꞌ e ángeles✡ Ap. 4:6-8 y ri nimak winak, chacal jun Kꞌapoj Bexex pachaꞌ lic ꞌanom cꞌax che. Wukub ri rucꞌaꞌ y wukub ruwach, waꞌ queꞌelawi e ri wukub uwach Uxlabixel re ri Dios takom lo che ronoje ruwachulew. 7 Ri Kꞌapoj Bexex xkibic y xucꞌam ri jubotaj wuj cꞌo pukꞌab uwiquikꞌab ri Jun tzꞌul pa ri tzꞌulibal. 8 Echiriꞌ cꞌo chi ri jubotaj wuj pukꞌab, ri cajib cꞌo quicꞌaslemal pachaꞌ e ángeles y ri veinticuatro nimak winak xquixuc quib xeꞌrakan ukꞌab ri Kꞌapoj Bexex. Conoje cucꞌaꞌam qui arpa y quicopa re oro nojinak che incienso. Wa incienso queꞌelawi e tak ri oración caquiꞌan rutinamit ri Dios. 9 Y caquibixoj wa jun cꞌacꞌ bix:
«Xew Rilal takal cheꞌla cacꞌam la ri jubotaj wuj
y calochꞌij la tak ri sellos nacꞌal che,
ma xya ib la pa camic y jecꞌulaꞌ xelokꞌ la rucꞌ ri quiqꞌuel la
conoje ruqꞌuiyal quiwach tak ri ticawex
che ronoje ruqꞌuiyal uwach chꞌaꞌtemal
y conoje tak ri tinamit chaꞌ quebuꞌana re ri Dios.
10 Xꞌan cꞌu la xa jun tinamit chique
y xꞌan la chique e chacunel chwach ri Dios
y quetakan cꞌu che ruwachulew» quechaꞌ.
11 Tecꞌuchiriꞌ xebenuwil uqꞌuiyal ángeles quisutum rij ri tzꞌulibal re takanic yey quisutum quij ri cajib cꞌo quicꞌaslemal pachaꞌ e ángeles y ri nimak winak. Ri quiqꞌuiyal wa ángeles na cachꞌijitaj ta cajilaxic ma lic e uqꞌuiyal millones. Yey xinto 12 lic co quesiqꞌuin che ubiꞌxiquil:
«Ri jun Kꞌapoj Bexex lic ꞌanom cꞌax che,
xew che Rire takal wi cacꞌojiꞌ ronoje takanic
y beyomal pukꞌab,
xew rucꞌ Rire cꞌo sakil naꞌoj y unimal chukꞌab,
xew che Rire takal wi caxuc ib chwach y cayac ukꞌij
ruma ri unimal uchomalil» quechaꞌ.
13 Jecꞌulaꞌ xebenuta conoje tak ri e ꞌanatal ruma ri Dios: ri e cꞌo chilaꞌ chicaj, ri e cꞌo che ruwachulew, ri e cꞌo chuxeꞌ ulew y ri e cꞌo chupa ri mar, jewaꞌ caquibiꞌij:
«Che ri Jun tzꞌul pa ri tzꞌulibal y che ri Kꞌapoj Bexex,
takal ri yacbal quikꞌij y ri caxuc ib chiquiwach
yey takalic cabiꞌxic cꞌo quichomalil y quichukꞌab
na jinta utakexic» quechaꞌ.
14 Ri cajib cꞌo quicꞌaslemal caquicꞌul pan uwach: «¡Amén!» quechaꞌ. Y ri veinticuatro nimak winak xquixucubaꞌ quib, xquikasaj cꞌu quimejelem cꞌa chuꞌlew y xquilokꞌnimaj ukꞌij ri Jun na jinta utakexic rucꞌaslemal.