99
God te polalubo king dao
1 Genuai Bidi king bidibao.
Te we bidi dabe wi elama, noma sai.
Aga te sia kingde te ensel dabe daide dugulalubaso,
tama te tǫ mali ebo dao. * Sai 25:22
2 Te Saionde Genuai Bidigo
te genuai bomo mu elalubao,
tama agai te tigidali tǫde bidibo
hani bage tonalubao.
3 Tigidali we bidigo aga te polalubo king
te genuai nogi elalubo homu koneaibao.
Tama augwa aga genuai nogi
ugwaba somainu yaibao.
Aga te tedali wiegi yai mu dao.
4 Bomai king, nago te doloba pai kolesaga wei ebo dao.
Nago da Israel we bidi dabeba
te doloba pai me wiegi yai kolesaga menama,
tama dago wali pali.
Tama nago dago te gasa we bidi dabe
te doloba pai kolesagade dagalumainu ilali.
5 Dagego te Genuai Bidigo nogi
ugwaba siąo, aga te dena God dao.
Dage pąba pelama, tama agaba lotu waiyąo.
Aga te tedali wiegi yai mu dao.
6 Moses dali Aron si te Genuai Bidigo pris bidali,
tama Samuel me augwalide te
Godiba lotu wali bidi me deli dao.
Augwa te Genuai Bidiba gedu haluasa po obaso,
tama agai augwaligo gedu haluasa
po wabo odai dao.
7 Aga te genuai dagalu pǫde bidama,
tama augwaliba te bomai po mani.
Tama te Godigo augwaliba mani bomai
po tigidali te augwaligo wali pai dao. * Sai 33:9
8 God, dago Genuai Bidi, nago te naga we bidi
augwaligo gedu haluasa po odali.
Nago augwaliba ola mawai, naga digi nage te God,
tama nago te augwaligo sęgę sela sąbo dao,
tiali goli, nago te augwa ebo
dwai sęde te dene mayu yai dao.
9 Te dena Genuai Bidi Godigo nogi ugwaba sao.
Tama aga bulu dude te agaba lotu wao.
God, dena Genuai Bidi, aga
te tedali wiegi yai mu bidibo dao.