3
Suŋŋana berek kana be Merere iporoukaala iti
Mboe ki Dabit Indeeŋe Dabit iko pa lutuunu Absalom na, itooro mboe ti
(2Sam 15:13–17:22)
1 O Yooba, koŋ koi bizin na, munŋaana ma munŋaana men.
Tomtom iwal kat, ta timaŋga be tizooro yo
mi tikam malmal pio.
2 Wal boozomen tizzo pio ta kembei:
“Kere. Anutu ko irao iuuli na som.
Pa ipizil ndemeene pini kek.”
3 Tamen Yooba, nu we siŋgiao pio mi poroukalkaala yo.
Nu ta kam yo ma zoŋ iwe biibi. Koroŋ toro sa som.
Mi nu ko pombol yo ma niŋ ise.
4 Nio aŋboobo Yooba be iuulu yo.
Mi ni imbot sala abal kini potomŋana, mi ileŋ suŋŋana tio.
5 Tana nio aŋsu muriŋ na, Yooba mataana pio
mi aŋkam kene tio ambai men mi aŋmaŋga mini. ✡ Mbo 4:8
6 Mi koŋ koi bizin munŋaana ka tieene ta timar tiliu yo na,
aŋmoto zin som. ✡ Mbo 23:4, 27:3
7 Yooba, maŋga mi swe mburom!
Anutu tio, kamke yo pa zin wal sananŋan.
Peeze koŋ koi bizin kwon ma zoŋon ipolpol.
Pun zin ma mburan imap kat.
8 Yooba, ni ulaaŋa ŋonoono.
Ni ko ikampe wal kini mi ipombol zin. ✡ Mbo 62:7+; Tur 7:10