3
Kapakap en Peki Sawas en Nimenseng b TITlE NI MAHSEN EN IPRU: Depit wiahda melkahka wet mwurin eh tangasang sapwellime pwutak Apsalom. 2 Sam. 15.13—17.22.
1 Maing KAUN, ei imwintihti kan me ngeder,
re inenen tohto me kin pelian ie!
2 Re kin koasoakoasoia ie oh ndinda,
“Koht sohte pahn ketin sewese.”
3 Ahpw Maing KAUN, komwi me soundoarepei sang me keper kan ahnsou koaros;
komwi me kin ketin kupwurehda I en kin powehdi,
komwi me kin ketin pwurehng kakehleiehda.
4 I patohwan likweriong KAUN-O, pwe en ketin sewese ie,
e ahpw ketin sapeng ie sang pohn sapwellime dohl sarawi. c DOHL SARAWI: Tehk 2.6.
5 I kin wendi oh memeir nipwong kan,
KAUN-O kin ketin sinsile ie.
6 I sohte kin masak kiden imwintihti kan
me kin kapiliepene sang wasa koaros.
7 Maing KAUN, komw ketido! Maing Koht, komw ketin kapitiehla!
Komw kin ketin kaloke ei imwintihti kan koaros
oh ketikihsang irail manaman en kauweiehla.
8 Manaman en powehdi kin pwilisang rehn KAUN-O—
en ketin kupwuramwahwih sapwellime aramas akan.