57
Kapakap en Peki Sawas j TITLE NI MAHSEN EN IPRU: En Depit melkahka, mwurin eh tangasang Sohl nan pwoaren paipo. 1 Sam. 22.1; 24.3.
1 Komw ketin kupwure ie, Maing Koht, komw ketin kupwure ie,
pwe I patohdohng rapahki sawasepei rehmwi.
I kin diar silepei pahn mwetehn nin limomwi kan
lao I daulih soangen apwal koaros.
2 I patohwan likwerih ei Koht, Wasa Lapalahpie,
ei Koht, me kin ketikihong ie ei anahn akan koaros.
3 E pahn ketin sapeng ie sang nanleng oh doareiehla;
e pahn ketin kalowehdi irail kan me katoutouwihielahr.
Koht pahn ketin kasalehiong ie sapwellime limpoak poatopoat oh loalopwoat.
4 Ei imwintihti kan kin kapikapil ie,
duwehte laion kei me kin men kang aramas.
Ngihrail kan duwehte ketieu oh arep,
lowarail kan duwehte kedlahs keng.
5 Maing Koht, komw ketin kasalehda sapwellimomwi roson lapalap pahnlahng,
oh sapwellimomwi lingan wasa koaros nin sampah.
6 Ei imwintihti kan wiadahr lidip pwe re en kolkiniehdi;
re katoutowihalahr ngeni kowahlap.
Re weirada pwoahr ehu mwohi,
ahpw re pein pwupwudiongehr loale.
7 Maing Koht, ni ei koapworopwor unsek,
I pahn koul oh kapinga komwi!
8 Ngeni, pirada!
Nei arp oh lair, kumwa pirada!
I pahn pangenda ketipin.
9 Maing ei Kaun, I pahn kapingkalahngan ong komwi nanpwungen wehi kan.
I pahn kapinga komwi nanpwungen aramas akan.
10 Sapwellimomwi limpoak poatopoat kipe wasa koaros nanleng;
sapwellimomwi loalopwoat kin leldawohng pahnlahng.
11 Maing Koht, komw ketin kasalehda sapwellimomwi roson lapalap pahnlahng,
oh sapwellimomwi lingan wasa koaros nin sampah.