113
Kapingpen sapwellimen KAUN-O Kalahngan
1 Kapinga KAUN-O!
Kumwail sapwellimen KAUN-O ladu kan,
kumwail kapinga mware!
2 Kapingpen mware en wiawi,
met oh pil kohkohlahte.
3 Sang palimese lel palikapi
kumwail kapinga mwaren KAUN-O!
4 KAUN-O kin ketin kakaun wehi kan koaruhsie;
sapwellime lingan sikdala sang nanleng.
5 Sohte emen duwehte KAUN-O, atail Koht.
E kin ketiket powe wasa ileilehie,
6 ahpw kin ketin mahsendihdo
oh ireirong nanleng oh sampah.
7 E kin ketin pwekada me semwehmwe kan sang nanpwel;
e kin ketin kasapwilada me paisuwedlahr akan sang ar apwal
8 oh kin ketin wiahkinirailla werek en me lapalap akan,
me lapalap en sapwellime aramas akan.
9 E kin ketin kawauwihala lih depwen kan nan imwarail kan;
oh kapaiahkin irail seri.
Kapinga KAUN-O!