8
Dulemar-Esdrasʼba-nonimalad-e-nugmar
1 Rey-Artajerjes Babilonia-yalagi negdakmaiunni, babgan-neguya-sedimaladi, degi, dulemar e-dadgan-e-dadganba-ilemakar-nug-mamaidi Babilonia-akale, Jerusalén-neggweburse anba-noni-gusmalad.
Amarde, wemalad:
2 Finees-wagansikid, Gersón.
Itamar-wagansikid, Daniel.
David-wagansikid, Hatús.
3 Hatúsʼde, Secanías-wagansikidid.
Paros-wagansikid, Zacarías.
Zacaríasʼbali, machergan, dulagugle-gakambe-mergu (150) nonikid.
4 Pahat-Moab-wagansikid, Zeraías-machi-Elioenai.
Elioenaiʼbali, machergan, dulataled-ilabo-mergu (200) nonikid.
5 Secanías-wagansikid, Jahaziel-machi.
Jahaziel-machibali, machergan, dulataled-ilapaa-mergu (300) nonikid.
6 Adín-wagansikid, Jonatán-machi-Ebed.
Ebedʼbali, machergan, dulabo-gakambe-mergu (50) nonikid.
7 Elam-wagansikid, Atalías-machi-Jesaías.
Jesaíasʼbali, machergan, dulapaa-gakambe-mergu (70) nonikid.
8 Sefatías-wagansikid, Micael-machi-Zebadías.
Zebadíasʼbali, machergan, dulabake-mergu (80) nonikid.
9 Joab-wagansikid, Jehiel-machi-Obadías.
Obadíasʼbali, machergan, dulataled-ilabo gakambe-gakabaabak-mergu (218) nonikid.
10 Selomit-wagansikid, Josifías-machi.
Josifías-machibali, machergan, dulabaabak-mergu (160) nonikid.
11 Bebai-wagansikid, Bebai-machi-Zacarías.
Zacaríasʼbali, machergan, dulagwen-gakabaabak-mergu (28) nonikid.
12 Azgad-wagansikid, Hacatán-machi-Johanán.
Johanánʼbali, machergan, dulatar-gakambe-mergu (110) nonikid.
13 Napi-sorba-nonimaladi, Adonicam-wagansikmalad, wemalad:
Elifelet, Jeiel, Semaías.
Amarbali, machergan, dulapaa-mergu (60) nonikid.
14 Degine, Bigvai-wagansikmalad, Utai, Zabud.
Amarbali, machergan, dulapaa-gakambe-mergu (70) nonikid.
Esdras, Jerusalén-neggweburse aligusad
15 Ani, Esdras, Ahavaʼse dii-iirmakmaid-gakaba dulemar an oambikusad. Agi, ibapaa anmar ambikusad. Agi bela dulemar-bukwa, degi, dule-irwa-Bab-Dummadse-gormalad-bukwa an daksad. Levita-dulemardi an gwen daksasulid.
16 Geb degine, dule-dummaganse an gochad:
Eliezerʼse, Arielʼse, Semaíasʼse,
Elnatánʼse, Jaribʼse, baid-dule-Elnatánʼse,
Natánʼse, Zacaríasʼse, degi, Mesulamʼse.
Degi, odurdaked-sailagan-Joiaribʼse, Elnatánʼse, an gochabalid.
17 Degi, Iddoʼse geb we-dulemar an barmisad. Iddoʼde, Casifiaʼye-neg-nugad-e-dummadid. Amar bela Iddoʼga ibmar-sogmaloedi, Iddo-e-gwenadganga ibmar-sogmaloedi, Casifiaʼginmaladga-ibmar-sogmaloedi, an ega sogsad. Adi, anmar-Bab-Dummadse-goled-negga, anmarga dule-arbamalad-barmidagegar.
18 Dog-nuedye anmar-Bab-Dummadga an sogdo. Bab-Jehová nued-anmargi binsamaid. Anmargala, dule-ibmar-nue-wisid Serebíasʼye-nugad barmialid. Serebíasʼde Mahli-wagangi-danikid. Mahliʼdi, Leví-wagangi-danimogad. Levíʼdi, Israel-e-machid. Serebías, e-machimala, degi, e-gwenadgan nonimalad. Serebíasʼbali bela machergan, warambe-gakabaabak-mergu (18) nonikid.
19 Deginbali, anmarga Hasabías barmilearbalid. Hasabíasʼbali, Jesaías Merari-wagangi-danikid nonimogad, degi, e-gwenadgan, degi, e-machimala nonimogad. Bela machergan, waladulagwen-mergu (20) nonikid.
20 Deginbali, anmargala, dulemar-Bab-Dummadse-goled-neggi-arbamalad dulataled-ilabo gaka dulagwen-mergu (220) barmiarbalid. Deun a-dulemar-e-dadgande, epenne, David-maiun, degi, e-dummagan-bukwaun, Levita-dulemar-bendakega na nug-imaksa gusad. Geb e-nugmar bela megisgusad.
21 Degine, Ahava-dii-iirmakmaid-walikaa anmar mas-gunsuli-Bab-Dummadse-golega ambikusad, adi, anmar-Bab-Dummad-asabin na san-bipi-imakegar. Degine, anmar-naoedba Bab-Dummad anmar-bendakega. De-ukinbali, anmar-mimmigan, degi, anmar-ibmar-nuegan-sedoedi bonisuli guegar. 22 Sordamar igarba anmar-isdarmaladgi anmar-bendakega, an reyse, sordamar danar-danar-bukwad anga barmidagega, an binge egisgusad. Deginbali, dule-moligi-urwemalad anga barmidagega, an binge ese egisgusbalid. Ar ade, anmar bato reyga sogsagusbinned: Dule Bab-Dummadba-gudimaladi, Bab-Dummad nue bendakmaiye, egi nued binsamaibarye. Degi-inigwele, dule-Bab-Dummad-igarba-dasurmaladdi, Bab-Dummad ourwega na imakdamarye. 23 Degisoggu, anmar Bab-Dummadse-golega mas-gunsuli-gudii gussunnad, degi, anmar-Bab-Dummadse anmar nue gochad, adi, anmar-bendakegar. Degine, Bab-Dummad anmar-ese-goled itosad, geb anmar-bendaknonikid.
24 A-sorbali, dule-irwa-Bab-Dummadse-gormalad-dummagan, e-dummagan-warambe-gakabo (12) an bachikii urbisad. Amarde, wemardo: Serebías, Hasabías, degi, e-gwenadgan e-ambebar (10). 25 Geb agine, rey, ibmar-ebulemaladi, mani, olo, anmar-Bab-Dummadga uksagusad, degine, dule-ega-binsaed-dakmalad, dule-dummagan, degi, bela Israel-dulemar-gudigusmalad uksamarmogad, Bab-Dummadse-goled-neg-sobega. A-ibmarmala a-dulemar-asabinni nibirgi an wilubdaksad.
26 Nibirgi an wilub-daksadi, wemalad:
Mani, nibir-milidulabo-gakabaabak gaka dulataled-ilagugle gaka dulabo-gakambe (48,750).
Ibmar-ebulemalad-manibiid, nibir-miligugle gaka dulataled-ilatar (7,500).
Ormar, nibir-miligugle gaka dulataled-ilatarba (7,500).
27 De-ukinbali, nog-dummagan-orbiid gwadulagwenba (20).
A-nogmar nibirambe-gakabakebak (19) aidikued.
Nog-nuegan-esgoro-gordikidgi-sobaled ise-daarmakarmalad, oryob-gargeguedi, gwabobar.
28 Geb a-sorbali, dule-irwa-Bab-Dummadse-gormaladga an sogded: “Bemala, degi, Bab-Dummadse-goled-neggi-ibmar-ebulemalad, Bab-Jehováʼga nug-imaklesmalad. E-binsaedba-ibmar-uksamaladi, we-ibmarmalad: Mani, degi, olo. Amardi, Bab-Jehová-anmar-dadgan-e-Bab-Dummadgadid. 29 Nue we-ibmarmar be dakmalo, nue sabomalo, Jerusalén-neggweburgi Bab-Jehováʼse-goled-neg-imbagi ibmar-wilub-imaklegedse. Agi, dule-irwa-Bab-Dummadse-gormalad-e-dummagan-asabin, degi, Levita-dulemar, babgan-neguya-sedimalad-asabin, wilub-imaklegoed.”
30 Degisoggu, mani, olo, Bab-Dummadse-goled-neggi-ibmar-ebulemalad, bela wilub-imaklesadi, dule-irwa-Bab-Dummadse-gormaladga, degi, Levita-dulemarga, uklesad, adi, amar Jerusalénʼse anmar-Bab-Dummadse-goled-negse sedmalagar.
31 Gebe-Nii-gwichid-ibambe-gakabogi anmar Ahava-dii-iirmakmaidgi-bukwa, Jerusalénʼse aligusad. Igarbali, Bab-Dummad bela-belad anmar-bendaksad, anmar-isdarmaladgi, degi, dule-ibmar-atursamaladgi anmar-bendaksabalid. 32 Geb Jerusalénʼse anmar modapidgi, wis ibapaa an obunnosmalad.
33 Geb ibabakegi, anmar-Bab-Dummadse-goled-neggi, mani, olo, Bab-Dummadse-goled-neggi-ibmar-ebulemalad, anmar wilub-imaksamalad. Geb, dule-irwa-Bab-Dummadse-goled-Meremot Urías-machi, aga ibmar-wilub-imaklesadi anmar uksad. Degine, Finees-machi-Eleazar, Meremot-walik gwismogad. Amar-abargi Levita-dulemar gwismarmogad. Amardi, wemalad: Jesúa-machi-Jozabad, degi, Binúi-machi-Noadías. 34 A-ibagi bela ibmarmar ebislesad, degi, wilub-imaklesad, degi, bela e-aidikuedi narmaklesad.
35 A-sorbali, Israel-Dulemar-galesgusmalad-gannar-nonimaladi Israel-e-Bab-Dummadga ibmar-ogumakar-ukleged ukdemalad.
A-dulemar we-ibmar-durgan uksamalad:
Moli-bebe-nikad-sapingana, warambe-gakabo (12).
Sibad-wawaad-machergan, waladulabake-gakambe-gakanergwa (96).
Sibad-wawaad-sapingana, waladulapaa-gakambe-gakagugle (77).
Degine, e-isgued-ular uksamarbalid:
Sibad-machergan, warambe-gakabo (12).
Bela Bab-Jehováʼga weligwaledgi we-ibmarmar-ogumakar uklesad.
36 Geb degine, Éufrates-diwar-dad-argwanedsik dummagan-negdakmamaidga, degi, suar-ibed-dummaganga, rey-igar-uksadi, uklesad. Amarde, Israel-dulemar-bendaksamarmogad, Bab-Dummadse-goled-neg-soblesad bendaksamarbalid.