5. JERUSALÉN-DULEMAR-WILEBUKWAD BAB-DUMMADSE-GOLED
5
(5:1-22)
Dulemar-wilebukwad Bab-Dummadse-goled
1 Bab-Jehováʼye, anmar-gusadi be ebinsae,
anmar-wiolenaid nue be dake.
2 Anmarga-ibmar-uklegoye-soglesadi, dule-bamalad anmar-ibe susad.
Anmar-negmar, dule-anmar-yarginsurmalad anmar-ibe susad.
3 Anmar bab-sated, anmar dule-sergan-satedga gunonikid.
Anmar-nangan suisuli gunonimalad.
4 Anmar dii-gobedi bennukergebed,
anmar sapanmar bakergebed.
5 Anmar-balegindimaladi, bato anmar-bargadanikid.
Anmar nue-geggus gudidimalad, anmar obunnoged sated.
6 Anmar mas-gunned-amiegala, Egipto-dulemarse argan-oyonai gualid.
Anmar mas-gunned-amiegala, Asiria-dulemarse argan-oyonai gualid.
7 Anmar-babgan isgusmaladba burgwismalad.
Anmardi, amar-isgusad-ulale, Bab-Dummadse sabsur-odurdaklesmalad.
8 Emide, maiga-gudidimalad, anmar-dummadga gunonimalad.
Amargi anmar-onogega dule sated.
9 Anmar mas-amiegala,
nega-dulesulidganba burgwednaga gudii gusmalad.
10 Anmar ukudmaad-itogedbali, uelledmalad.
Anmar-abagan diopi-diopisur itoleged.
11 Sión-neggweburgi omegangi nue-dodolesad,
Judá-neggweburmargi yagangi nue-dodolesbalid.
12 Anmar-dummagan argangi-atinnar bannu-bannu nasiklesmalad,
anmar-dadormargi dadormardeeye gwen binsalessulid.
13 Anmar-sapingan ibmar-gwag-nagega imaksamalad.
Burwigana sapan-gwaad-seedbali ibitodii guarmalad.
14 Neggwebur-yawagak-noedgi sapin-dummagan bar ambikusurmalad.
Sapingan bar namaksurmalad.
15 Anmar bar weligwar itosulid,
anmar-weligwaledgi-gwiled wile-itogedga binyenonikid.
16 Anmar ologurgin bar sisurgusad.
¡Anmar duledar-wiles! ¡Anmar isgusad!
17 Anmar gargangued bergumaid,
a-ulale, anmar nolloo atakgusad.
18 Ar Sión-yargi bar dule gudisulid,
Sión-yargine, unnila ibdurgan-sapurbarmaladbi gudinanaed.
19 Degi-inigwele, be Bab-Jehová, degisadegu negsemaid,
be reyga degisadegu maid.
20 Bab-Dummad, ¿ibiga be anmar-iesdae?
¿Ibiga be undar anmar-iege?
21 Bab-Jehová, gannar anmar bese-dagega be anmar-imake,
geb gannar anmar bese dagoed.
Anmar iduar igi-gudigusa,
deyob be gannar anmar-imake.
22 Innikigwadba be anmar-obachad,
bela-bela be anmar-isdar daksad.