6. DULEMAR-YAR-BAID-BAIDGI-BUKWAMALAD SABSUR-ODURDAKLEGOED
9
(9:1-8)
1 Bab-Jehová we-gayaburba Hadrac-neggwebur-annik, degi, Damasco-neggweburnik sogsagusad. Bab-Jehová bela-dulemar-bukwadi dakmaid, degi, bela Israel-dulemar-danar-danar-bukwamalad dakmaibalid. 2 Deginbali, Bab-Jehová Israel-dikarba-yar-naid Hamatʼye-nugad dakmaibalid. Bab-Jehová, neggwebur-nasgusbukmalad: Tiro, degi, Sidón, dakmaibalid.
3 Tiro-dulemar galu-matusulid-gandikmalad sobsad.
Ukub-mergueyob mani onmaksad.
Igarba olli-nanaiyob ormar onmaksad.
4 Degi-inigwele, Bab-Jehová bela e-ibe ibmar sunonikoed,
bela e-ibe e-ibmar-nuegan demargi mioed.
Soogi bela e-neggwebur ogumakoed.
5 Ascalón-dulemar deyob-neg-guoedi dakmaloed, geb dobgudmaloed.
Gaza-dulemar, naibid-dummad itomaloed.
Ecrón-dulemar e-bendakleged-edarbediid-sate-dakarmalale, nunmaked-dummad itomarmogoed.
Gaza-dulemar, rey-sate gumaloed.
Ascalón-neggwebur dulemar-sate sigoed.
6 Asdod-neggweburgi dule-isganamar megnonikoed,
Filistea-dulemar-na-e-nug-dummarba-imakdiid, an obelogoed.
7 Filistea-dulemar ablisba-mesa-san-gunmaladi, an obelogoed.
Mas-ise-gulleged-gunmaladi, an obelogoed.
Filistea-dulemar-abar-bemaloedi, anmar-Bab-Dummadgadga gunonimarmogoed.
Amala, Judá-dulemar-e-dummaganga gunonimaloed.
Ecrón-dulemar, Jebuseo-dulemaryob gumaloed.
8 Mer dulemar anse-goled-neggi yogasaar dogsa-dogsa-gumalaga, an egi nakuledii guoed.
An-neggweburgi dule-emar-sabsur-imaked bar dognonikosulid,
ar an-sunnagwad an egi nakuledii guoed.
7. SIÓN-E-REY-MEGNONIKOED
(9:9-17)
Sión-e-rey
9 Sión-dulemar, ¡be nue-wergumala!
Jerusalén-dulemar, ¡weligwaledba be binnasur gormala!
¡Weligwaledba be gormakmala!
Be dake, be-rey bese danikid.
Be-rey, dule-innikigwadid, emar-abonogedid,
na san-dummarba imaksulidid.
Moli-uayasuid-bipigwad-birgi-sii danikid,
we-moli-bipigwad, moli-uayasuid-ome-e-mimmid.
10 We-rey, Efraín-e-moli-urmar-bila-onoged obelogoed,
Jerusalén-e-molimar obelogoed.
Warsib-bila-onoged bibisgoed,
bela dulemar-yar-baid-baidgi-bukmaladga, neg-bogidikidgi sunmaknonikoed.
We-rey, bela demar-nanaid-ugakaase neg-ganonikoed.
Éufrates-diwar-maid-akar, bela we-napneg-bergunaidse, neg-ganonikoed.
Israel-dulemar gannar bendaklenonikid
11 “An bebo-ablisba-igar-mesisad-ulale, be-dulemar-dia-dummad-dinnagwadgi-galesbukwamaladi, an onogoed.
12 Dule-galesbukmalad-bendakleged-edarbebukmalad, gannar e-neg-gandikid-bukwadse dagmala.
Ar emi an bega soged,
bemar-wilesadbali, bur bule ilabo-wilub wergued an bemar-imakoed.
13 An-warsiyob an Judá-dulemar gachii gaoed,
an-siguyob an Efraín-dulemar imakoed.
Sión-yar, an be-mimmigan, Grecia-mimmigangi-yolegega an imakoed.
Bila-onogedgi-es-suid-ebulegeyob an be-imakoed.”
14 Bab-Jehová Grecia-dulemargi nonikoed.
E-sigu, mala-aidegeyobi miledoed.
Bab-Jehová-Bela-Gangued-Nikad gar-trompeta ogornonikoed,
dad-nakwed-argan-nuedsik-burwa-dummad-goled-abargi naoed.
15 Bab-Jehová-Bela-Gangued-Nikad na e-sordamar-bendaknonikoed.
E-sordamar, e-isdarmalad-e-gingimar bela obelogoed.
Vino-gobeyobi ablis gobmaloed
abali, mummu-gunanaiyobi, allenanaioed.
Igi ablis ibmar-ogumakar-ukleged-ailagi-eolegega nogmargi enoledae,
deyobi, ablisbi-moodo gudimaloed.
16 A-ibagine, e-Bab-Dummad-Jehová,
na e-sordamar sibad-wawaadyobi bendaknonikoed.
E-sordamar Bab-Jehová-e-yargine,
ologurgingi-akwa-nuegan-bukwadyob dakarmakdemaloed.
17 Ibiyobi bela we-ibmarmar, doggus-nued daklenonikoe.
Ibmar-gwag-gulleged sapingan-ogannogoed.
Vino-ochigwad, weligwar bunamala-imaknonikoed.