28
Sangam ko aira
(David ko wur)
1 O Yawe, ni aninga Manga gek am,
ani nikate aisam;
degewa gurugu ale agiring ilupko;
mena mu, ani kariimet kua namaman mu toroman kua namarikko.
2 Aninga niara ikiko,
gemang aisu ale aga sangaruko!
Ani agiting patawurem nika kuwim laili
te bagasam mu te garukem ale ka arusam.
3 Ani kariimet memek bitawara mu arungak me aga gurasi saparko;
nuna kariimet nongorak bagasan mu arungu den welang balsan,
bare nongomang motam ningi ikia memek karogo terong mam.
4 Nononga kiwem memek bita lagaman mu koma nungaruko;
nunga memek mu ko koma, te beteman
uwutata te iki iki koma nungaruko.
5 Nuna Yawe ko ura biya se mel bita lagaram mu me ko ikia tasan;
buta se nu nunga maguwurok ale nunga menawurokko.
6 Ani Yawe ko nup patawurikko,
mu awuk, nu aninga aira ikiam.
7 Yawe mu aninga sokel se aninga karem;
ani nu te ira sanamasam se nu aninga sangarso;
se ani ninguru amilmilasam
ale wur te nup patawusam.
8 Yawe mu ko kariimet nunga sokel bagoso;
nu ko king baongam mu bitarso ale sangaru taso.
9 Se Yawe, nika kariimet nika ma nunga
balem mu nunga sangaru ale marak sokel nungaruko;
ale nunga bitua kari baga se nunga gi patawu se nunga bitaruko.