86
Kaem kager kari nuguting te aga bataguru taukko guranek
(David guranek imi batogam)
1 O Yawe, aninga wosenga iki ale aga sangaruko;
ani agata aimi sangikko me terong.
2 Ni aninga bitaruko, mu awuk, aninga angamang motam nikate la beterem.
Ni aninga Kaem; ani nika ura kari yawara;
ani nikate la loaga lagasam.
3 O aga Biya, ni ani ago ko gemang
batagukko, mu awuk, ani kowarkalal maiya nika aru lagasam.
4 Nika gemang lila ka ura kari ani aisuko,
mu awuk, ani ni keta kete angamang motam bita lagasam.
5 O Kari Biya, ni ningo, se ni memek siwu sapara ko Kaem,
se awiriya nika arusan mu ni nunga kua lagasam.
6 Bore te se, O Yawe, degewa gurugu ale aninga guranek imi ikiko;
ni aninga niara iki ale aga sangaruko.
7 Aninga ikup ko tom ningi ani ka aurik,
mu ani ko ikisam, ni aninga agiring ilupko.
8 O Kari Biya, kaem kasik la nunga ningi mu bo ta nika iwita mena;
nika kiwem mu kiwem suen la nunga kia saparam.
9 Sor kasik la ni nunga nungem mu taimon ale ni kema te nip patawumonko;
nuna nika nip nikim garagar mu patawumonko.
10 Mu awuk, ni keta ni biya se ni kiwem
yawara duap duap nunguningkiri betesam;
ni keta suanta ni Kaem.
11 O Yawe, nika kiwem aga kasuru se
ani nika kiwem diram la karo tui se lagarikko;
angamang motam suanta awur se
ani ni keta suanta ka bowa ningi baga se lagarikko.
12 O Kari Biya, ni aninga Kaem,
ani angamang motam lilim la te ka nip biya patawurikko;
ani nika nip biya pempem la balu se lagarikko.
13 Mu awuk, nika kua ani aisa mu kalel biya;
ni ani kuera ko mutim ningi iwita wore aga patawu taem.
14 O Kaem, nunumi patawura ko kari alo agarak barimasan;
nuna ilu biguwuman ale aninga momon se kuerikko;
nuna ni mel yam ko ka betesan.
15 Bare Kari Biya, ni mu gemang bataga se gemang lila ko Kaem,
ni gemang tairate me magoso;
se ni ninguru nanga kuesam ale gemang nangara nunguning nangarsam.
16 Buta se kema gurugu ale gemang aisuko;
ani nika ura kari, nika ura imet bo ko
namar, se aga bataguru to ale sokel aisuko.
17 O Yawe, nika ningo nuam ani ago ko wore ko kausa bo bitar se
kager kari memek alo arigimon ale dolomonko,
mu awuk, ni aninga sangem ale angamang motam patawurem.