113
Yawe mu kituwura guat alo nunga Kaem tala* Juda alo Passover na namonko mu girisan Israel Wur 113 se 114 mu kausan ikisan. Se na no kutuwusan mu Israel Wur 115 nama 118 kausan ikisan. Matthew 26:26-30 ago arikko.
1 Ana Yawe ko nup patawunakko!
Nina ko ura kari alo, noko nup patawuralko.
2 Yawe ko nup aitak tom imi te se tom
udagi te am butata patawu se lagaralko.
3 Koma worem bausa te nama worem
kapara te, Yawe nup patawuralko.
4 Yawe ali sor suen la bitarso;
noko nikim nup biya mu taiti gomang kia saparam.
5 Awiri Yawe, anananga Kaem, mu toroman?
Nu ko daiga kuwim kalel biya mu te dagiwa se,
6 gomang motam nangarso se taiti ta, ali ta, motam kaposo se
ninguru ari kutuwuwoso.
7 Nu kariimet kituwura guat, bune tutuk ali te mu gi no se,
nongota nunumi sangarmonko me terong, mu nunga sangarso,
8 ale nunga gi terong la noko kariimet
supuling alo nunga ningi nunga awuso se yawarakala bagasan.
9 Nu imet kuin sisira mu nunga bagara aolak te nunga sangarso,
se kuriang ilusan ale amilmilasan.
Se ana Yawe ko nup patawunakko!
*^ Juda alo Passover na namonko mu girisan Israel Wur 113 se 114 mu kausan ikisan. Se na no kutuwusan mu Israel Wur 115 nama 118 kausan ikisan. Matthew 26:26-30 ago arikko.