141
Kaem nanga sanguk se kiwem memek kianakko ko guranek
(David ko wur)
1 O Yawe, ani nika arusam; tairate agate tairko.
Tom ani ka aurik mu, agiring ikiko.
2 Aninga guranek mu mel yawara bo ko tama bur siring yawara iwita toko;
aninga agiting kanuwa mu, tirom bainga ko tama bita kisa iwita.
3 O Yawe, aninga agiring ko sinar to se
agiring angamili te den memek bo me ta aratukko.
4 Ni agarkiwer se ikia memek bo aninga angamang motam me tagirok,
agi kilek memek betera ko kariimet alo
nongorak munan memek bitirik ale
nunga nam giam ningi me nongorak daigekko.
5 Kakirip ningo dirkiriyam mu aga memek ko bu am aisuokko,
mu kiwem ningo agate beteso;
nu am ining aisuokko; mu aga dingumuso.
Ani kiwem imi ko me ta angamang ikuwoso, mu awuk,
ani kariimet memek alo mu nunga
memek koma kaola ko guranek bita lagasam.
6 Se memek alo umu nunga kari supuling
mu garap te nunga warmon se kapamon, umu te asele
nunga kariimet nunga ikia sinar aruk se
balmon, “Kari mu ko den umu
nunguningta nunguningkiri,” mamonko.
7 Ale balmon, “Nononga nosokelel mu
manga papak mam ale parasaram bilik
bilik kaparam iwita kuera mutim duap te sor iram,” mamonko.
8 O Yawe, ni keta suanta ni Kaem, ani ni kete la loaga lagasam;
ni aninga yumura kuwim, se ani nika ningi yumusam;
ni aga bita to se me kua namarikko.
9 Ni aga sangaru se bawang bo ago ko kereman mu me aga kutirokko,
nunga dagarok kereman mu ningi me sorarikko tala.
10 Bare memek bitawara alo mu nunga
ngual awur se nongota nunga dagarok nunga taliparukko,
se ani mu yawarakala la nunga kia kaparik ale ningo la bagarikko.