1 GODAI Iyyooba hagaadan yaagiis; 2 “Iyyoobaa, asi Ubbaa Danddayiya Xoossaara mootettidi, shatimmi erii? Ane Xoossaara mootettiya uri ayyo zaaro” yaagiis.

3 Hegaappe guyyiyan, Iyyoobi zaaridi, hagaadan yaagiis; 4 “Abeet GODAU, taani pattenna laafa asa; taani neeyyo waata zaaranau danddayiyaanaa? Taani ta doonan ta kushiyaa wottaas. 5 Taani issitoo haasayaas; shin taayyo zaariyoobi baawa. Naa77anttuwaa haasayikke” yaagiis.

6 Hegaappe guyyiyan, GODAI gotiyaa giddoppe Iyyoobassi hagaadan yaagiis; 7 “Attumaasadan ne xeessaa gixxa denddada, taani oichchiyoogaa taayyo oda. 8 Neeni tana mooranchcha kessana hanai? Neeyyo xillo gidanau, tana worddo kessai? 9 Xoossaa wolqqaa mala wolqqai neeyyo de7ii? Xoossai guummiyoogaadan neeni guummanau danddayai? 10 Hegaa gidikko, ane ne bonchchuwaaninne gitatettan dendda! Ne puulaanne anggaa maaya! 11 Ne hanqquwaa teegaa ane tiga; otorettiya asa ubbaa xeellada, ane kaushsha! 12 Ane loitta xeellada, otorettiya ubbaa yeellaya; iitaa oottiyaageeta ubbaa eti de7iyoosan yedhdha! 13 Eta ubbaa biittan mooga; duufuwaa duge wottada, eta gordda. 14 Yaatikko, ne wolqqan neeni xoonanaagaa taani neeyyo markkattana.

15 “Taani nena medhdhidoogaadan medhdhido, Bihemoota giyo do7aa ane xeella! I booradan maataa mees. 16 A xeessan de7iya wolqqainne a uluwaa kammida shayaa minotettai keehi daro. 17 A goinai zigaadan sitti gi uttiis; a gediyaa xaphotikka minuwan dooqettidaageeta. 18 A meqettati nahaasiyaa bombbaa mala; a gedeekka birataa hiraqotu mala.

19 “Xoossai medhdhido meretatu ubbaappe i aadhdhi maalaalissiyaagaa. A Medhdhidaagaappe attin, a xoonanau danddayiyaabi baawa. 20 Do7ai ubbai kaa7iyo deree ayyo miyoobaa mokissees. 21 Agunttai de7iyo mittaa garssan zin77ees; maqqaa giddon torqquwan qosettees. 22 Agunttai de7iyo mittati bantta kuwan a genttoosona; shaafaa doonan mokkiya mittati a kammoosona. 23 SHaafai kixxidi goggiyo wodekka dagammenna; Yorddaanoosa SHaafai a som77uwan xarccettiyo wodekka i saro de7ees. 24 A aifiyaa toissidi, a oiqqanau danddayiya asi de7ii? A siiriyaakka piriyaa qaran caddi oiqqanau danddayiyai oonee?