1 Žoa'a yegw da' ẕden ḻo yežlyó Babilonia,

wže'žo ga na', na' wžeẕžo katen' bejsá' ḻáže'žo che yež Sión.

2 Ḻo ni'a na' yag labada' žoa'a yegon'

bgáḻa'žo da' ka' ẕgoḻžo.

3 Benne' ka' bché'gake' žo'o ka benne' zej ndo'w ka' wnnábgekle' žo'o goḻžo.

Benne' ka' bchínnjgake' yež chežo góžgake' žo'o yebelžo, na' wnnágake':

“Le goḻ cheto' da' ka' beḻ-le ḻo yež Sión.”

4 ¿Nakx̱kze gak goḻžo da' wká'n ẕenžo X̱anžo Dios,

ga zoato' ḻo yežlyó ni chegak benne' zi'to' ka'?

5 Cha' gaḻ ḻaža'a yež Jerusalén,

ẕnnabla' Dios gone' ga wnít na'a ḻi ža yeḻa' waḻ chen.

6 Ẕnnabla'-ne' gone' ga ta' loža'a chichjla'

cha' bi chejsá' ḻaža'a che yež Jerusalén,

na' cha' bi wká'n ẕenan'.

Yežen' naken da' žaz ḻáže'ḻi'a.

7 X̱ana' Dios, bejsá' ḻaže' da' ẕinnj da' bengak benne' Edom ka'

ḻo ža katen' bchínnjgake' yež Jerusalén, na' wnnágake':

“¡Le wchinnjen! ¡Le wchinnjen, na' zejte ḻo lenen!”

8 Ḻe'e, benne' Babilonia ka', kwia yi'le.

Ba nez ẕen gaken che bennen' gone' chele kan benle ḻe'e cheto' neto'.

9 Ba nez ẕen gaken che bennen' ke'e x̱kwide' chele ka'

na' wzoẕje' ḻégakbe' ḻo yej x̱e.