97
1 Ko e māfimafi ʻoe puleʻanga ʻoe ʻOtua. 7 ʻOku fiefia ʻae siasi ʻi he tautea ʻe he ʻOtua ʻae kau tauhi tamapua. 10 Ko e enginaki ke māʻoniʻoni mo fiefia.
1 ʻOku pule ʻa Sihova;
tuku ke fiefia ʻa māmani;
pea nekeneka ʻae ngaahi ʻotu motu.
2 ʻOku takatakai ia ʻe he ngaahi ʻao mo e fakapoʻuli:
ko e angatonu mo e fakamaau ko e tuʻunga ia ʻo hono ʻafioʻanga.
3 ʻOku muʻomuʻa ʻae afi ʻiate ia,
pea vela ke ʻosi hono ngaahi fili ʻoku takatakai.
4 Naʻe fakamaama ʻaki ʻa māmani ʻa hono ngaahi ʻuhila:
naʻe mamata ʻae fonua, pea tetetete.
5 Naʻe vela ʻo vai ʻae ngaahi moʻunga ʻo hangē ko e pulu ʻi he ʻao ʻo Sihova, ʻi he ʻao ʻoe ʻEiki ʻo māmani kotoa pē.
6 ʻOku fakahā ʻe he ngaahi langi ʻene māʻoniʻoni,
pea mamata ʻae kakai kotoa pē ki hono nāunau.
7 Ke puputuʻu ʻakinautolu kotoa pē ʻoku nau tauhi ʻae ngaahi fakatātā kuo tā,
mo nau polepole ʻi he ngaahi tamapua:
lotu kiate ia, ʻakimoutolu kotoa pē ʻae ngaahi ʻotua.
8 Naʻe fanongo ʻa Saione,
pea fiefia ai pea naʻe fiefia ʻae ngaahi ʻofefine ʻo Siuta,
koeʻuhi ko hoʻo ngaahi fakamaau, ʻE Sihova.
9 He ko koe, ʻE Sihova, ʻoku ke māʻolunga hake ki māmani kotoa pē:
ʻoku ke māʻolunga lahi ʻaupito ʻi he ngaahi ʻotua kotoa pē.
10 ʻAkimoutolu ʻoku ʻofa kia Sihova, mou fehiʻa ki he kovi:
ʻoku fakamoʻui ʻe ia ʻae laumālie ʻo ʻene kakai māʻoniʻoni;
ʻoku ne fakamoʻui ʻakinautolu mei he nima ʻoe kau angahala.
11 Kuo tūtuuʻi ʻae maama maʻae māʻoniʻoni,
mo e fiefia maʻae angatonu ʻi loto.
12 Mou fiefia ʻia Sihova ʻae kau angatonu;
pea fakafetaʻi ʻi he manatu ki heʻene māʻoniʻoni.