1 Yake dokome Kamongo Anatu baa neta renge ingyuo karamo doko panelyamo.

Pyuo wasiyamo kingi mono dokome banya kingiŋi lao panelyamo.

2 Yuu gii kwuara yangara pyuo pao epo pipyamo dokome

Anatumi pyuo wasiyaŋa lao pano lapa lapa pilyamo.

3 Mendasa wambu ingyuo epo pii lao

dee lyapu lao pipyamo see nange.

4 Dopa pipyamopape nakambana neta rao yuu muu dupwana pumbinyi dokome

yake yuupi rambungi dolapona kapa kapa pyuo soo otelyaminyi.

Anatumi yake dokona renge kuiyuo rao karena lao panda wasakamiya.

5 Enda mapwae lenge kambu nyuo

akali makandalana rungi rungi pingi dopale ingyuo rao potemo epenge.

6 Yake pinjingi pakirena kanda sepala pao

pinjingi paki dokona oko singi.

Kama ketae piso rao karelyamopa bange mendemepe kapa nee pii nange.

7 Kamongona mawa pii dupwa nyisu yakunaipi pisa nao singi dokome

wambu enenge ingyuo porai renge maingi.

Kamongona mawa pii dupwa soo nyepala karapenge ingilyamo dokome

yangilyamo karelyaminyi wambu dupwa singinya renge maingi.

8 Kamongona mawa pii dupwa rolae ingyuo penge.

Mendeme dokona soo rape rape lao minyaraminyi dupwa rae maiyuo parami.

Banya mawa pii pinya lao lenge dupwa angi dokona lenge dokome soo nyingi renge maingi.

9 Kamongo lao kingi wapambupi lakao lakandenge doko keyange ingyuo singi.

Dokona dopako pyuo soo para ingilyamo.

Kamongome koo keyangepe lao yapalya yapana pyuo angi dokona lenge.

Doko peparae rolae ingyuo penge.

10 Anatunya mawa pii rungi rungi pingi dupwame kana golo ama keyange doko nyuo isa palyingi.

Dee mende suu pyao doko amburalinya ipwange rende pipyamopape Anatunya mawa pii doko ama rende wakasa pingi.

11 Mawa pii dupwame namba embena kendemande karo doko soo nyinginya renge nyuo jingi.

Jilyamopa nambame banya pii doko rape rape lao pyakamingi dokona baame renge keyange isingi jingi.

12 Wambu dupwa range kopetamekamenge pilyaminyi doko soo gisa nalyaminyi.

Kamongo embame namba koo pilyuŋu lao suu pyaa nao mee pyaka sipyamo pipilyu dupwana kingi rekyalao nyepe.

13 Koo pinya wangu lakao suu pilyu dupwana namba pasarene lao minyape.

Dupwame namba poraiyuo minyuo isinya laa nare.

Dopa pirinyi dokopa namba rolae ingyuo nyisu yakunaipi pisa naronopa

mendeme namba kando koo pingiŋi laa narami ingilyamo.

14 Kamongo, namba kyawa lete nyepala lete wai pyao nyingi.

Dokome nambanapii dee suu pingipi dolapo embame angi lalyane lao soo nyakape.