1 Ayy Tap̱a, dhalku/ ki ḵucur aha/ ka nyor pini mo

walla dhalku/ ki dor aha/ ka nyor pini jin shwana /e mo!

2 Haala thop̱am pini ḵarana dum ’per pem ’kup̱ mo,

dhali me’d pini p̱u’dkina p̱om pem mo be.

3 Dhali moŋkamu/ mura shuman buŋgwar is pem is mowa?

haala nyor pini jin shwana /e caaca mo.

Dhali mowac̱a kamu/ di’d goma simam pema?

gom miinthus pem mo be.

4 Haali/ miinthus pem loski aha/ ki ’kup̱i lu/ mo,

dhali uni ’thiraa/ diṯ mmoḵal mo be.

5 Jamam pem ’kakin mo dhali bulabul mo dhali taga ’bi/ nycine/ mo

gom miim p̱us pem mo.

6 Aha/ kumkunu ’twa/a ’cesh mo dhali ’dac̱al ’ko’da ’cesh mo.

Isa yempa/ yula tente/ mo tani aha/ yakina gwolu/ mo.

7 Haali/ empa’d pem a’di ’tu’dkunu ki mo jin ’batha’ba’th mo,

dhali moŋkamu/ mura shuman buŋgwar is pem is mowa?

8 Aha/ kumkunu ’twa/a ’ceshi ’baar mo dhali sirica p̱o/ ki sho’k mo.

Aha/ ohonkina mo goma dulaṯṯ ma nyor ma dum pem mo.

9 Tap̱a, aris mom pem kun gwon ma du mo tani mishu ki /e mo.

Dhali ashurem pem jin wuka/ mo tani ’konuki bag ’peni /e mo be.

10 Adum pem shwa’d ki ju’k ju’k mo dhali mom’bi’th pem ushi me’d mo e aha/ mo

dhali apinya/ em pem jin shwa’d ki o’d mo tani, uni si’da/ uskin ’peni aha/ mo be.

11 Imugum pem dhali uni gun nyaḵ aha/ ii ka yempa/ mo tani uni doshkin ki moŋḵo/ is ’peni isa nyor pem kun wo’cki aha/ she/ mo,

dhala bas pem si’da/ uni doshkin isa dhana/ mo.

12 Uni gwansan kun simmki mondiki/em pem e mo tani ’thikina gumem buni mo.

Uni gwansan kun simmki mo e jin mina uni shi/ aha/ is mo tani oki gwo kun minu kup̱ mo

dhali kulum gwo ibwa mmo’ce’da ’ce’d me’di isi yula tente/ mo.

13 Hili aha/ wana e ki wathin ’diye/ mo, aha/ dinaki ciḵ toŋ kamu/ mo.

Aha/ wana e ki wathi/ jin mol ’twa/ wal mo jin mol ’twam piti ḵa’d mo.

14 Nye, aha/ wana e ki wathi/ jin mol gwo ciḵ mo,

dhali e ’twa/ mo tani aha/ dara gi gwoŋ ḵucur mo.

15 Hili e /e mo tani ayy Tap̱a, /e be ic̱orkaa/ mo be.

A’di ta /e be, ayy Tap̱a Arumgimis pem, /e jin mini thoḵa thoḵ ’twa/ mo be.

16 Haali/ aha/ ’thona mo ki: Uni mini dhalki bwa ki ’kuny ap̱o/ aha/ mo.

uni gun dhu ’ba/ ki ca ap̱o/ aha/ mo ki sho’k pem yereski’d mo.

17 Aha/ ’dishkina mmobiṯ mo,

dhali mo jin woca is aha/ she/ mo tani a’di di’da bori aha/ ki sule/ sule/ mo.

18 Aha/ pikina gwo gom tonthus pem jin miika/ mo,

aha/ ḵala bwan diṯi’d gom miinthus pem mo.

19 Uni gwansan kun ta ’kup̱ pem mo tani dar gi ’ko mo uni ’bitha’bi’th mo,

dhali uni gwansan kun shi/i aha/ i e ki shi/ thus mo tani uni tana ris mo.

20 Dhali uni gwansan kun raḵki aha/ tonthusi bway gom tom ’boro’d mo tani

uni ita ’kup̱ pem kun tana ris mo haali/ aha/ baṯẖa jasi tom ’boroni ’ko’d mo.

21 Dhalku/ ki dhal aha/ ’pen mo ma, ayy Tap̱a,

ayy Arumgimis pem, dhalku/ ki si’d ’peni aha/ mo!

22 Huru/ ki jahanne/ mmowoṯẖ aha/ mo,

ayy Tap̱a, gi bway mowoṯẖ pem mo.