52
Eya manyuḵ gway mo. Gway jin yuḵ ma Dawuu’d mmoyetha ye’th sho’k mo me’d jin p̱u’dkin ma Duwaag jin ta Wathi/ gi Pan Aduum, dhali ṯora Shawuul gwo mo ka: Dawuu’d p̱u’dki’d mo e gu’b ma Aḵimaalik mo.
1 Atinta kara /e ’ba/ ki ca mo, ayy wathi/ jin c̱a’bki dem dem mo?
mmota pibi ap̱o/ ’kwani kun tana gayiin mo.
Isa yempa/ /e kar gwo shiyi’d e ilu/ mo mmo’ce’da ’ce’d sho’k mo.
2 ’Twam pini kaaka me’da nyer mo,
/e jin tana manmii mii jin hekuwa he’k e mo.
3 /E ki en tonthus mmobol jin ’boro’d e mo
dhali /e ki o gwo ka ṯor mmobol gwoŋ gana/ e mo.
Doshi ma dhali ’cunycuri yan mo.
4 /E ki en aris gwo kun losina los mo,
ayy /e jin tan ma le’d pini ahe’k e ka he’k e mo.
5 Hili Arumgimis midi ’ce’d /e bwa ka ’cesh ki sule/ mo.
A’di midi bor /e mo dhali dher /e bwa mo ’peni gu’b burrinyem pini mo.
Dhali /e minu yu’d mo ’peni mo jin ’kona ’kwani mo.
Doshi ma dhali ’cunycuri yan mo.
6 Uniŋ ḵar/e mini p̱ar e mo dhali ḵo/ is mo
dhali p̱e’th a’di mo mmo/o gwo mo ki:
7 Hili wathi/ yan jin ’tena bwa mmokara Arumgimis ki a’dim piti jin hura a’di jwa icine/ mo,
hili a’di ki gam gwo is e tom piti jin ishin ka enthus jin tana a’di pa ki pa mo,
dhali a’di ki ŋap̱ mo jin huru jwa e ’penkap̱an piti jin tana a’di mo.
8 Hili aha/ wana e ki cwa seṯuun jin c̱a’bki go’d go’d
e gu’b ma Arumgimis mo.
Aha/ gamkina gwo is e mo/en ma Arumgimis jin ṯelu sho’k
ki sule/ ki sule/ mo.
9 Aha/ mina c̱i /e bwam ’boro’di is ki sule/ ki sule/ mo,
haali/ /e miiki a’di mo.
Aha/ mina bah gway pini haali/ a’di ’boro’d mo be,
e buŋ’kus uni kun tana gayiin mo be.