5
Buk ikatibil-wan
1 Bo akin towen nissin wakaban, wanaka̱tay buk kweitan nikibil; lelel palatan palatan nises. Youd kweinim kweiy ikapkik waseg, youd tasiyas mamagina pwalsilas va̱gan nag bikaliyowes, yagan sil.
2 Bo akin Yowbad nataka̱yob tawtoun, aygan avakaein iwkuwak; ilana, “Kal kadilok bikablev anasil buk towen waseg, va̱gan kid bilat?”
3 Nag gog; nag teitan gum-liba̱lab, nag teitan gimgeilin ven watinow, nag teitan guma-Tum; na-ikadilokes bila̱tes buk towen o bikines wanuwan, nag.
4 O yey, bo ava̱lam avakaein peinan nag iban teitan kal ikadilok bilat buk towen o bikin wanuwan.
5 Tamumwey tasiyas nisesus; tamwey teitan idibakeig, ilana, “Awoum kuva̱lam. Teitan bo itakayway, mtowen mamagina layon tonen, anakum Yud, mamagina gidwa̱lin Deibid waseg isob natun, mtowen bikablev buk towen anasil kweinim kweiy, mo bilat.”
6 Bo akin nakabsis o mansiyas man mwana̱vas. Bo akin la̱miy wanuwein mansiyas man o wanuwein tammwayas, itamanaw itow; mamagina bo iweiys imat. Anadog kweinim kweiy; matan kweinim kweiy, tasiyas mamagina Yowbad Kululuwan teinim teiy nikayabes mo nineis vena babaw wadaban pwepway.
7 Im ikow buk towen nises wanaka̱tay towen nissin wakaban.
8 Wankuyeim mansiyas man mwana̱vas sisiyas tamumwey sinawey teivas mo ikululs wamatan La̱miy; aleis hap tatanok tatanok iwaways igilagel, o abmavin iysiyous, won goul-wan, bo ika̱lawt gewuw, nigob kov, manisin simasim seikwan. Youd towen mamagina sikanitoug Yowbad angamag, aveiyag initougs Yowbad waseg.
9-10 Asiwous kweivaw ikanunuwels mamagina:
“Kadilokeim bukukow buk towen;
kadiloka bukwablev sil nikapkik waseg;
peinan nikatimateims, o buya̱vim waseg nukugimweles gamag silma̱nin Yowbad,
kum katanok katanok wasigeis,
kaeig katanok katanok wasigeis,
dal katanok katanok wasigeis,
o ven katanok katanok wasigeis,
nukusekes siwotet mamagina guyawaw o tanuwgwes lun,
va̱gan kid biwteles lun daYowbads silma̱nin.
Peinan bo bikaleiwags ven watinow waseg.”
11 Mo akin, o aligen ages Yowbad nataka̱yob singay babaw isiwnis nakabsis o mansiyas man o tammwayas; sikavnivin babiweis lakatunim tawsan sisiyas singay babaw tawsans.
12 Ages avakaein ilivans; ilansa,
“La̱miy towen neiweiys nikanig, kadilok towen bikow nakaleiwag avakaein, navavag babaw, ansinap avakaein, o natawtoun, va̱gan kid gamag babaw biya̱kawns waseg, bikavasis, asilivan bwanabwein waseg.”
13 Bo aligen ages Yowbad nakabwabub babiweis walba̱lab, o watinow, o pwepway waskawan, o wabwanit, ilansa,
“Tayakawanes o takavvasis o takatitubaws Tatawtoun Towen wakaban son La̱miy, tut nag beikous.”
14 Mansiyas man mwana̱vas mo ilansa, “Eimen”; o tamumwey tasiyas mo ikululs, itapwa̱louls waseg.