88
Gway jin yuḵu mo. Gway gom iya/ ma Guurah mo. Eya manyuḵ gway mo, isi ki gway jin gwonu gom bwan diṯi’d mo. A’di ta gway mmoyetha Hemaan jin ta Wathi/ ma Asraah sho’k mo.
1 Ayy Tap̱a, Arumgimis pem, aha/ yuḵkina /e mmowoṯẖ aha/ montee mo.
Aha/ gwokina mon’thiny ibwambori /e mo.
2 Dhalki mon’thom pem p̱u’dki’d ibwambori /e mo,
ḵa’di ’cem pini mmociḵ kom pem mo.
3 Haali/ aḵashiram pem a’di ’tu’du/ mo ki monṯo’c bwa mo,
dhali mondiki/em pem a’di ḵalkina mo mo mmo’disha Haawiya is mo.
4 Aha/ deŋu e nyaḵki uni gwansan kun iikin ka luŋgu’b e jisa ’kulga/ mo.
Aha/ tana wathi/ jin dar gi mom’bi’th mo,
5 dhali mmowa e ki a’di jin dhalkunu ’pen e bwaman jwa mo,
dhali wa e ki wathi/ jin ’koshkunu mmo/ish e jis jwa mo,
dhali wa e ki uni gwansan kun dina /e ki ka e doḵ/e mo,
haali/ uni ’ciṯẖkunu ’twa/ mo ’peni me’d pini mo.
6 /E karki aha/ e jisa ’kulga/ mo,
dhali e pa gi mondhurumi’d dhali moŋ’kulga/ mo.
7 Anyor pini ishki’da p̱o/ aha/ ki diṯ diṯ mo,
dhali /e kumki aha/ ’twa/a ’cesh ka ris mii gi lanthinem pini mo.
Doshi ma dhali ’cunycuri yan mo.
8 /E ki raḵ uni gun nyaḵ ii ki aha/ mmogas aha/ mo.
/E ki kar aha/ mmota to jin bulabul gom uni mo.
Aha/ mu’thkunu ’twaŋkal e bwaman mo wakan ki aha/ mina mol ye mo.
9 Em pem caki’d mo mmoḵala ’tum gom bwan diṯi’d mo.
Isa yempa/ aha/ yuḵkina /e mo, ayy Tap̱a.
Aha/ ṯe’dkina me’d pem gom /e mo.
10 A/e mii miimer gom uni gun wukina?
A/dhali kun iikin mo mini cu mis mo mmomaŋ /eya?
Doshi ma dhali ’cunycuri yan mo.
11 A/mo/en pini jin ṯelu sho’k bahu e jis jwa mowa?
Walla dhali mo ma isiŋ ganam pini e mo jin kup̱u mowa?
12 A/momer pini mishu e mondhurumi’d mowa?
Walla a/mo jin tana /e is ki me’d mmowoṯẖ ’kwani e mony’cesh jin dhaluwa dhal ’pen mishu mowa?
13 Hili aha/, ayy Tap̱a, gwokina ’twa/ e /e mo.
E mon’thamo/ a’thom pem yaki’di bwambori /e mo.
14 Ayy Tap̱a, atinta ibiṯa /e aha/ asho kan mo?
Atinta baga /e jis/em pini ’peni aha/ mo?
15 Mo jin jwakaṯkunuwa du mo dhali mowu ’dishki aha/ is mo ’pena tee jin taka/ dhuru’c mo,
aha/ ’koshu is ka nyor goma purem pini mo. Aha/ dara gi mowoṯẖ mo.
16 Anyor pini a’di dhi’thki aha/ sho’k mo.
To jin ḵo/ka/ is ’peni /e uni bu’thkina bu’th mmo’ce’d aha/ sho’k mo.
17 Uni ’kamki aha/ is me’da gannu/ yi’de/ jin guski’d ka tee ’baar mo.
Uni ’kamki aha/ ’kup̱ ki deḵi monṯal ’de/ mo.
18 /E ki raḵ uni gun eni aha/ dhali imugum pem mmogas aha/ mo.
Imannyaḵ ’kom pem uni ’kon e mondhurumi’d mo.