104
1 ’Bori Tap̱a mii mo, ayy ḵashiram pem mo, ayy Tap̱a Arumgimis pem, /e a’di icaaca kagahara mo.
/E hi’thkunu ki montaḵ mo dhali mo/eḵ mo,
2 /e jin ’kamki is pini ki moŋkush me’d burrinye/ jin ’kamu is mo,
/e jin bele’thki momis me’d gu’b burrinye/ mo,
3 /e jin ’thikina ḵa’dum gi gu’b pini ap̱owa ris yi’de/ ’baar mo,
/e jin dhukina raḵ me’d arabiyya jin dira shumarum pini mo,
/e jin merkina p̱owa bi gi ’tham mo,
4 /e jin dhuki ’tham ka ris mmota iman/ii gom /e mo,
o’d dhala le’dan o’d jin shwa’d ki bar bar mo tani uni mii /e to mo.
5 /E ki kar mony’cesh e moŋḵa’b piti mo,
wakan ki a’di minu ’koki yiḵin is ki sule/ sule/ mo.
6 /E ki kum a’di ’kup̱ ki moŋ’kulga/ me’d burrinye/ jin kumu to ’kup̱ mo.
Dhali yi’de/ doshki’da p̱owa ris wosha turga/ mo.
7 Ki gwom pini jin ḵucurkina /e uni mo tani uni sokin mo.
Dhali ki kon dor ma sho’k pini mo tani uni yakina ŋwac̱a/ mo.
8 Aris wosha turga/ cuki mis mo, dhali embul wosh mo tani uni cic̱kin ka ’cesh mo
e mo jin karkina /e ’pen ka pije/ gom uni mo.
9 /E ki kar gwayu/ mo ki uni mini ’koki pe mo,
wakan ki uni mini ’taki ’koki halas mony’cesh doḵ/e mo.
10 /E ki dhu yi’de/ kun ’du’dun mmogac̱ ka pije/ e embul wosh mo.
Uni yakina ŋwac̱a/ e embul ma ris wosh mo.
11 Dhali uni ’baar mo p̱ikina to/e ’baar mo kun ’kon e bwaasho mo.
Thuluny bwaasho si’da/ uni kap̱kin ’peni mo jin budha yi’de/ uni mo.
12 Ki uni mo tani ’dii kun p̱eni momis mo tani gamki moŋ’kom buni mo.
Uni wolki gway e bwaman ma risa biny cwa mo.
13 ’Peni monyc̱a’b pini jin dina /eya ’ta’dama mo tani /e wolki yi’de/ ap̱o/ wosha turga/ mo.
Mony’cesh a’di kap̱kunuwa du ki maman miin to ki me’d pini mo.
14 /E raḵkina sho ca’d gom to/e mo,
dhali dhu emen to jin mina ’kwani si mo,
ki a’di midi dho’th maman tonṯe/ ’peni mony’cesh mo,
15 dhali yimana mura’th jin ḵa/u ki ŋah ŋah mmo’kunya duŋ ’kwani mo,
dhala yin mmokar bwam/em piti ki ’tikil ’tikil mo,
dhali tonṯe/ mmo’bi’th ’kwani adu mo.
16 Aris cwa gi Tap̱a uni wolu yi’de/ ka enthus mo,
dhali arisa bwanyayiis gi Pan Lubnaan jin sikina a’di mo.
17 E uni mo tani ’dii nyaŋki gu’b buni mo,
dhala gwamp̱i/ taki’d ki gu’b piti ap̱o/ cwa jin wana e ka ṯup̱ mo.
18 Dhali aris wosha turga/ mo tani uni gom mi kun ’koni bwaasho mo,
dhali wosh uni ta mo jin hur ma warriny jwa icine/ mo.
19 /E ki kara ppe mmoya yil mo,
dhali atente/ mishi mom piti jin mina a’di iyul mo.
20 /E ki kar mondhurumi’d mo dhali a’di ta ji mon’thiny mo,
ka ris to/e ’baar mo kun ’kon e mombwaasho mo tani parkina ’cesh mo.
21 Ushi dhuruca dhop̱ uni aŋkarki ko mo gom tom buni kun ’kwarkina uni ka gwap̱i/ mo,
mmosimm tonṯem buni e mo ’peni Arumgimis mo.
22 Ka tente/ sulki’d mo tani uni sokin ’pena tente/ mo
dhali bag is buni e jurum wosh mo.
23 Dhali wathi/ yaki’d mmomiiya ṯu’c mo
dhali a’di ki miiya ṯu’c piti ntagi mom’pimpili/ mo.
24 Ayy Tap̱a, mii gi me’d pini wan ma p̱o/ e diṯa/.
E moyuḵ mo tani /e uḵki uni ’baar mo.
Aris mony’cesh ’tu’dkunu ki tom pini kun uḵkina /e mo.
25 Bwamp̱o/ ḵumma/ yi’deŋ ’kulga/ mo kun caaca mo dhali kun beena bwa ki bee mo,
a’di jin ishkina to/e ki mus mus ibwaman kun uḵu mo kun molu deŋ e mo,
kun ’kon ki e mo nyaḵki kun gwa’da is mo dhali kun caaca mo.
26 Dhali arisa ḵur yi’de/ si’da/ hashkina p̱o/ a’di mo
dhala dhan to yi’de/ a’di jin uḵkina /e mmoguwa ŋalbothoŋ ibwaman a’di mo.
27 Aris to gwansani ’baar mo hil ’kup̱ki /e mo,
dhali /e c̱iki uni tonṯem buni mmoshwa ka tentem buni ki she/ ki she/ mo.
28 Ki /e ki c̱iki uni to mo tani uni tulki a’di isi monṯal ’de/ mo.
Ki /e ḵa’dki me’d pini mo tani uni ’tu’dkunu ki tom ’borga/ mo.
29 Ki /e bagki jis/em pini mo tani uni biṯkina bwa ka luŋgu’b mo.
Ki /e ki bu’th shi/in buni mo tani uni wukin mo
dhali doḵ ka nyaŋ’ko’d e bu’da’cesh buni mo.
30 Ki /e hashki Shi/in pini mo tani uni uḵkunu mo be
dhali /e ki ta bwam/e gi mony’cesh this mo doḵ/e mo.
31 Dhalki monyca gi Tap̱a a’di i’dim ’kup̱ ki sule/ sule/ mo.
Dhalki Tap̱a ’kunya bwa e miim piti mo,
32 a’di jin hilki mo ap̱o/ mony’cesh mo dhali a’di deeki’d ki bir bir mo,
a’di jin taki wosha turga/ is ki me’d mo dhali uni yakina ku’d mo.
33 Aha/ mina yuḵ gway e Tap̱a mo me’d jin dika/ ki e mo.
Aha/ mina yuḵ gway mmomaŋa Arumgimis pem mo me’d jin kusha buye/ aha/ mo.
34 Dhalki gwom pem jin kulum aha/ ibwa mo tani ’bor a’di bwa mo,
haali/ aha/ ’kunya bwa e Tap̱a mo.
35 Dhalki imanmii miinthus ṯushunkunu ki o’d ’peni mony’cesh mo,
dhali dhalki imanmii to kun ’coḵa’coḵ mini mii dhalku/ ki ’ko mo doḵ/e.
’Bori Tap̱a mii mo ma, ayy ḵashiram pem.
Maŋi Tap̱a mo.