1 Dxuxrén lazra' Xrana' Dios.

Ájazra che̱n' dxi'u bénne'du xu'a:

“Bzrunnuj, guxíaj lu xí'ala ca tu bxinne?”

2 Le na' xque, dxulucuéza benne' ca' dxelune̱' da cale̱la

Ba zaj naxrúe̱' xaga nalá xéche'ze chee̱' lu du chee̱ na,

3 Chete ca' xelexinnaj da dxulusé̱ chuchu da xrlátaje,

¿ájazra xelún benne' xrlátaje ca'?

4 Xránadxu Dios zúaqueze̱' lataj lá'azxa chee̱'.

Xabáaqueze zua lataj blau naga dxe' Dios.

Dxelenná' xanne xiaj lawe̱'.

Dxelé'ene̱' ca da dxelún bénneache.

5 Xránadxu Dios dxudée̱' chawe' benne' xrlátaje ca' lu da ste̱be.

Dxecuídene̱' benne' ca' dxelune̱' da cale̱la,

ne benne' dxelune̱' da zrinnaj.

6 Gudée̱' benne' ca' dxelune̱' da cale̱la lu da zi' da xa',

da zaj naca na xi', ne da dxuzézrele̱'e da dxala na ca xedxe,

ne tu be' lále̱'e̱, da ca' sel-le̱' lawe' benne' ca'.

7 Caní gune̱' lawe' da naca xrlátaje Xránadxu Dios,

ne nazrí'ine̱' da naca na xrlátaje.

Benne' li lazre' ca' xelelé'ene̱' lawe̱'.