1 Nakabsilamaw sinap bwanabwein, nitoug. Kadiloka tut babaw kuninitougs pines sidayas; kadiloka kugilagels Yowbad waseg va̱gan mo bilabes gamag babaw; nitoug waseg kadiloka bikalin nuwamiy peinan Yowbad ilabes tasiyas.

2 Kadiloka tanitougs pines tasiyas king sisiyas takaleiwags babaw, va̱gan bimtakavateids mo bitasesus bwein, mamagina niwal waseg, o bitavna̱ses Yowbad nakaleiwag beibwein, adsinaps bwanabwein waseg.

3-4 Yowbad sivinan adsinaps ma̱wan. Mtowen ikatinabweids, o sivinan kid bikatinabwes gamag babaw, o sivinan gamag babaw bikakins sinap mounid.

5-6 Sivinan bitakakins kid Yowbad anmwa̱net. Tayuwein-vak anmwa̱net bilabeids va̱gan Yowbad bikalin nuwan wasigeis ya̱kids; mtowen gimgilitoun Yeisuw Kelis, won tatonen itam ikanig va̱gan biymiyiseids ya̱kids. Tutan bo ikadilok mo ikamtel Yowbad nakaleiwag towen, klos waseg nikanig.

7 Mapuna bo isekeig gunwotet va̱gan bakokew liva̱nen Kelis, bakatimlakes tobwag ven gimgilis sinap mounid va̱gan bisimounids waseg. Nag bayaweid, nag. Mounid Yowbad nisekeig gunawotet towen.

8 Sivinag tawaw ven babaw bininitougs Yowbad waseg. Awoum bikameiliws o bikamnimans; awoum. Bweina bitamnawes nimes mo binitougs sinap bwanabwein waseg.

9-10 Vinay kadiloka bisikams dibes bwanabwein, awoum bunadog bibasis bibabaw; awoum ta̱kas singay bitoumis bibabaw; awoum botobot babaw bisenas wakayous; awoum dob bitoumis bein wanakaew. Deisa bisiwa̱youbs son siwotet bwanabwein biwteles. Sinap towen bwanabwein tapwa̱loul silma̱nin.

11 Tapwa̱loul waseg kadiloka vinay bikka̱pays-wan, biliganes livan.

12 Nag ba̱tam vinay bikatimlakes tawaw o bikaleiwags wasigeis; awoum. Kadiloka bika̱pays-wan.

13 Peinan Yowbad wanmugwana ibun Adam; Iv wankuyeim.

14 O Seitan nag ikatidev Adam; nag. Ikatidev gog kuda̱vin; ansinap mo ivag kalbaleb.

15 Tage vin kavel bisimounid Yeisuw waseg, o bisiwa̱youb, nag bikalimwa̱saw, tage ansinap kamnat, Yowbad mo bikatinob vin mana̱wen, inakopway waseg.