1 Neꞌeŋa nyaꞌaŋ ka Paul due Atens teŋin keŋ Korint teŋin. 2 Anina ka o nye Jew dim dau one yuꞌure buon Akuila, ka ba duꞌa o Pontus teŋin, one nam kpelim yi Room n be Itali teŋin kena ne o poꞌa Prisila, gomena Klaudius tis wada ye Jew dim wusa duom Room teŋin la zug. Ka Paul keŋ ye o kaae ba, 3 ka kpelim anina ban a gbanzabnam la zug. Ka ba laꞌam tum. 4 Ka o pianꞌad laꞌasug doogin vuꞌusum daar wusa n zigid ye o fendig Jew dim ne Greek dim ka ba siak o pianꞌad la.

5 Ka Silas ne Timoti daa yi Masedonia teŋin paae na la, Paul daa nokne o meŋ yaꞌa wusa tuꞌasid labasuŋ la n yet Jew dim la ye Yesu la a Kiristo. 6 Ka ba kiꞌis o ka pianꞌa pianꞌabeꞌed o yela. Ka o kpaꞌas o fuug n paꞌali ba ye li kaꞌ suꞌuŋaa, ka yeli ba ye, “Ya yaꞌa bodig, li ane ya meŋ yel ka mam baꞌa kaeꞌ. Lin yi saŋkan nwa waꞌae m na keŋ bane kaꞌ Jew dim la saꞌan.”

7 Ka o basi ba ka keŋ be one kaꞌ Jew dim nid yin, one yuꞌure buon Titius Justus ka puꞌusid Winaꞌam, ka o yir daa kpiꞌe laꞌasug doog la. 8 Laꞌasug doog la kpeenm daa ane Krispus ka on ne o yidim wusa niŋ Zugsob la yadda. Ka ninsieba bedego bane be Korint teŋin wum labasuŋ la ka niŋ yadda ka ba suu ba kuꞌom.

9 Ka yuꞌuŋ yinni ka Paul zaansim ka Zugsob yel o ye, “Da zot dabiem, amaa kpelim pianꞌam ka da base; 10 ka m be ne uf. Soꞌ ku nyaŋe daam uf bee poaꞌalime fo. Nimbane be teŋin nwa bedego ane m nidib.” 11 Ka Paul zinꞌin anina yuum ne pusuk n paꞌan nidib Winaꞌam pianꞌad.

12 Ka saŋkan ka Gallio daa soꞌe Akaia soꞌolim la, ka Jew dim due laꞌase gbanꞌe Paul n mor o keŋ koto ni 13 yel ye, “Niŋkaŋa nwa zigid ne ye o fendig nidib ka ba puꞌus Winaꞌam, line pu dol ti wada.”

14 Ka Paul n daa nam bood ye o pianꞌa la, ka Gallio yel Jew dim la ye, “Neꞌeŋa yaꞌa aane line kaꞌan suꞌum bee tuumbeꞌed siꞌa ka o maalin, m naan modigin ne yanam Jew dim. 15 Amaa lin a pianꞌa nwaꞌasug ne yuda nwaꞌasug ne ya meŋ wada nwaꞌasug la, yanam gbanꞌami li; ka mam ku niŋ neꞌeŋa sariakata.” 16 Ka o kadi ba n yiis koto la ni. 17 Ka ba wusa gbanꞌe Sostenes one a Jew dim laꞌasug doog kpeenm, n buꞌ o koto la tuon. Amaa ka Gallio pu gos ban tum siꞌel laa.

18 Ka Paul kpelim zinꞌin Korint teŋin ne yadda niŋidib la ka li yuug. Ka o yuꞌun keesi ba ka kpenꞌ aaruŋ ne Prisila ne Akuila n keŋ Siriya teŋin. Ka on daa nam pu kpenꞌ aaruŋ Kenkiria teŋin la, ka pun o zug on daa puꞌulim n tis Winaꞌam la zug. 19 Ka ba paae Efesus teŋin, ka Paul bas Prisila ne Akuila anina ka keŋ kpenꞌ laꞌasug doogin n tuꞌas ne Jew dim Yesu Kiristo labasuŋ la yela. 20 Ka ba sos o ye o kpelim ba saꞌan n yuug. Amaa ka o zanꞌas, 21 ka keesi ba ka ye, “Winaꞌam yaꞌa siak m na leb ya saꞌan na yaꞌas.”

Ka o yi Efesus n kpenꞌ aaruŋ 22 n paae Sizerea ka keŋ Jerusalem n puꞌus yadda niŋidib bane be anina la ka nyaan keŋ Antiok.

23 Ka o yuug anina biꞌela ka yi n goond Galatia teensin ne Frigia teensin n kpemisid yadda niŋidib la wusa suꞌuŋa.

24 Ka Jew dau soꞌ one yuꞌure buon Apollos ka ba duꞌa o Alekizandria teŋin la kenn Efesus na n a pianꞌ miꞌilim daan ka miꞌ Winaꞌam gbauŋ suꞌuŋa. 25 Dau nwa paam zamisug Zugsob la suer yela ka kpeꞌeŋid o meŋ paꞌan Yesu suer suꞌuŋa, hale laꞌam ne on miꞌi ne Joon kuꞌom suub maꞌaa la. 26 Ka o pinꞌili tuꞌasid ne sukpiꞌeuŋ Jew dim laꞌasug doogin la. Ka Prisila ne Akuila wum o pianꞌad la ka dol o keŋ bigis o Winaꞌam suer la yela suꞌuŋa n paas.

27 Ka o bood ye o keŋ Akaia teŋin ka yadda niŋidib bane be Efesus teŋin la kpemis o, ka sob gbauŋ tis yadda niŋidib bane be Akaia ni la ye ba diꞌem o suꞌuŋa. Ka o paae anina n suŋ bane ka Winaꞌam daa tisi ba o yelsum ka ba niŋ o yadda la. 28 Ka o tuꞌas ne Jew dim la hale n nyaŋe ba paalo ni n paꞌali ba Winaꞌam gbauŋ poogin ye Yesu ane Kiristo.