146
Padèch Chuaq Taiq Haq Jùp Đò Bàc
1 Ha-lê-lu-ya! Padràu hau ca Chuaq!
Ô mahua yiang au padràu hau Chuaq beq!
2 Dìq ca 'nhòng au jah padràu hau Chuaq;
au ŏi rìh pàng leq, au jah calêu padràu hau ca Boc Plình da au pàng aih.
3 Paq lùi 'bài bùa, hadai paq lùi nòi con mangai crŏng taneh,
nòi wì haq ùh i bìac jah dèch claih.
4 Hihèm pat, chac hamac mangai hlài ta taneh;
ta hì aih 'bài trong hatình da haq tajòi 'mòi hnhung dŏng.
5 Xôq ramŏt ca mangai leq i Boc Plình da Jacôp jùp đò,
haq 'nac dèh manoh canòm ca Chuaq, Boc Plình da haq.
6 Haq Chuaq ma broq plình crŏng taneh,
diac raxìq wa rìm ngè ma ŏi ta aih; Chuaq hloi hloi wèq dèh bàu joq 'nàng,
Chuaq hloi hloi wèq dèh manoh joq 'nàng,
7 Haq hadrah ta-atoq am ca mangai ma 'bìq padit padiang,
wa am dahwèq caq ca mangai pangot.
Chuaq dŏih claih mangai 'bìq ŏi tù;
8 Chuaq pèh mat mangai ùh xao;
Chuaq bahnhuh hlài mangai 'bìq gàu cùp;
Chuaq loq waq ca mangai rìh ta-atoq;
9 Chuaq wèq ban mangai jàn trùh enh nòi 'noiq,
jùp đò mangai lac wa mangai hadrô;
mahaq Haq rèq đac trong da mangai ngang dù,
10 Chuaq jah wèq cwìang hloi hloi;
Ô Jê-ru-sa-lem, Boc Plình ìh broq bùa trùh hloi hloi!
Padràu hau ca Chuaq beq! Ha-lê-lu-ya!