1 Dxenaba' Xránadxu xenne̱' chi'u lu zra zu' lu da ste̱be,

ne gucu'uj La Dios chee̱ Jacob lue'.

2 Dxenaba' Le̱' naga zue̱' lataj lá'azxa chee̱' sel-le̱'

ne chee̱ xi'a Sión xide̱' guxre̱' lue'.

3 Dxenaba' Le̱' cheajsá lazre̱' ca naca xúgute̱ guna' bzu' chee̱',

ne si' lu ne̱'e̱ béadu ca' dxuzezxu' lawe̱'.

4 Dxenaba' Le̱' gunne̱' lue' ca naca da dxezá lazru',

ne gune̱' xúgute̱ da dxéquenu' xrlátaje.

5 Béle̱'e̱ntu' gate guselé̱' lue',

na' chísantu' tu da gulé'e lawe na La Dios chee̱dxu.

Dxenaba' Xránadxu gunne̱' lue' xúgute̱ da dxenabu' lau Le̱'.

6 Na'a nezda' dxuselá Xránadxu bénnea' ba gucá'aqueze̱'.

Naga zue̱' xabáa lá'azxa chee̱' xenne̱' chi'i bénnea'.

Xel-la' waca zrente̱ chee̱' guselé̱' bénnea'.

7 Bal-la benne' dxuluxrén lazre̱' carro ca' chee̱ wedil-la,

na' xezícadxe̱' dxuluxrén lázre̱' bzrina' ca'.

Dxi'u dxuxrén lázredxu La Xránadxu Dios.

8 Benne' ca' gulate ni'a ne̱'e̱, ne xeajlechazie̱'.

Dxi'u bexásadxu, na' ze̱dxu.

9 Bselá netu', Xran, nacu' Wenná Bea chee̱ntu'.

Ben chi'intu' gate dxuláwizrantu' Lue'.