3
Dìq Ca Xinoi Pòq Tôiq Lôi
1 Ô con caiq Is-ra-ên, tamàng bàu cô beq, cô bàu Chuaq capoch tajraq hlài ca pì, aih tajraq hlài dìq dŏng ca hadròng hadrech Au ma 'nong loh khoi enh Aicàp.
2 “Au khoi ràih toq pì
ta rìm hadròng hadrech ta crŏng taneh;
'màng aih Au trùh baxa pì
taiq rìm bìac ngang dù pì.”
3 Tàng baiq ngai ùh hatroq ca dabau,
èh jah lam pajùm ti dabau 'mòh?
4 I baco hlari leq ma grenh tàng
haq 'nhòq rùp jah hanùm 'mòh?
Baco hlari radam leq loq grenh ŏi ta còp
tàng 'nhòq rùp jah cleq 'mòh?
5 Chìm ùh 'bìq rùp ta hlàm
tàng ùh i ca hanùm ta hlàm.
Tàng ùh hlech cleq,
èh hlàm i đêh tŏc enh taneh ùh?
6 Tàng i ken hlôi ta phôq,
jàn ùh crè 'mòh?
I ca bìac ranàc leq trùh ta phôq
tàng Chuaq ùh broq loh 'mòh?
7 Joq 'nàng Chuaq Boc Plình ùh broq mòiq bìac hlèp leq ma
ùh pa'noh dèh ca 'bài hapŏng Haq,
aih 'bài mangai capoch thai Boc Plình.
8 Jò baco hlari khoi grenh,
cabô ma ùh crè?
Jò Chuaq Boc Plình khoi doi,
cabô ma ùh enh capoch hlài bàu doi da Haq?
9 Anoi 'noh ta 'bài đôn hanình Achđôt
wa ta 'bài đôn hanình da Aicàp beq, doi:
“Pì tagop ŏi ta 'bài bôi wang da Sa-ma-ri;
ngan bìac manhài càn ta aih,
wa bìac padit padiang ta jàn haq beq.”
10 Chuaq doi: “Wì haq ùh broq bìac lem jang;
wì haq tablah yŏc cùng hang 'mùt dèh ta hnem.”
11 Taiq 'màng aih Chuaq Boc Plình doi:
“Mangai tagit ca pì jah trùh dudan ca taneh pì;
bahnhung đac padren pì,
wa raliang đac 'bài đôn hanình pì.”
12 Bàu Chuaq doi:
“Tìah ca mangai ban trìu toq dŏih jah
baiq toq jènh loq mòiq toq don trìu khoi enh hacùng baco hlari,
èh con caiq Is-ra-ên hadai 'màng aih,
wì mangai ma rìh ŏi ta Sa-ma-ri wa ta Đamat hadai
jah dèch claih toq 'biaq.”
13 Chuaq Boc plình i cwìang itai, doi: “Tamàng wa anoi pariaq bìac cô ca hnem Jacôp beq.”
14 “Ta hì Au baxa Is-ra-ên taiq tôiq lôi haq,
Au hadai raliang đac 'bài ca'bŏng tadreo da Bêtên;
'bài aki da ca'bŏng tadreo 'bìq coh
ca'nìh clìh đac ti ha'neq.
15 Jò aih Au raliang đac hnem ralìm
wa hnem padrang;
'bài hnem càn caiq broq xam bla rŏih jah raliang
wa 'bài hnem càn jah hnhung đac.”
Chuaq doi 'màng aih.