3
Waiq Khàn Daxroq: Canòm Chuaq!
Đawit Achìh Jò Haq Cadàu Mot ca Ap-sa-lôm
1 Chuaq ôi! Bàc hrìn mangai git ca au,
bàc hrìn mangai yòng tajraq hlài ca au.
2 Bàc ngai doi mahua yiang au:
“Boc Plình joq 'nàng ùh dŏih dèch haq.”
3 Mahaq Chuaq ôi, Ìh raq khìan au đòiq au jah hanình;
Ìh raq can 'ngah 'ngai da au, wa Ìh dèch gàu au jah ngoi.
4 Jò au creo ca Chuaq,
enh wang hadròih da Haq, Haq padreo bàu ca au.
5 Au ca'nùng jah cùi hnia,
au rìu jah catèm ma jah 'màng aih Chuaq wèq ban au.
6 Au ùh crè 'nhac ca i bàc ngŏng mangai
dudan ca au pôn pah.
7 Yòng beq Chuaq ôi! Boc Plình da au ôi!
Xìn dèch au jah claih,
ma jah 'màng aih Chuaq khoi tep tabŏc dìq ca wì ma tagit ca au;
Ìh khoi gria hanenh wì mangai ngang dù.
8 Bìac dèch dŏih trùh enh Chuaq.
Waiq xìn xôq ramŏt da Chuaq ŏi ti jàn da Haq!