1 Man Paul one a sarega nid Yesu Kiristo yela, ne ti baꞌabiig Timoti sobid gbauŋ tisidi ti zua suŋ Filimon one a ti tumtum tiraan, 2 ne ti taunn Afia ne Arkipus one a ti sogia tiraan Yesu Kiristo tuuma ni, ne Winaꞌam nidib bane laꞌased fu yin la.

3 Ti Baꞌ Winaꞌam ne ti Zugsob Yesu Kiristo na tis uf yelsum ne sumalisim.

4 M puꞌusid Winaꞌam bareka saŋa mekama ka tiendi fu yela m Winsosugin, 5 bozugo m wum fun niŋ ti Zugsob Yesu yadda siꞌem laꞌam ne noŋilim line ka fu mor ne yadda niŋidib la. 6 M sosid Winaꞌam ye tiname a yadda niŋidib ne taaba la, na ke ka ti baŋ suꞌuŋa ne line wusa a suꞌum ka aa ti din tinam a yinni ne Kiristo la. 7 M baꞌabiiga fu noŋilim la tis man sumalisim ka li kpeꞌeŋi m sunf hale, bozugo fu maꞌae yadda niŋidib la wusa sunya.

8 Dinzugo m bood ye m sos uf noŋir zug, laꞌam ne man mor kpiꞌeuŋ na tunꞌe tis uf noor la. 9 Li ane man Paul one a Yesu Kiristo niŋkudug ka nan be sarega ni o yela la, 10 sosid uf m biig Onesimus yela, on ka m liebi o saam m sarega beilim ni la, (Onesimus gbin ane ye tumir.) 11 O daa kaꞌ tumir saŋsiꞌenee, amaa o yuꞌun sid mor tumir man ne fu saꞌan.

12 Ka m lem tum o fu saꞌan na, one a m nyoorin kobug. 13 Li naani malisini m bedego o yaꞌa kpelimini m saꞌan ka ziꞌene fu noba zug suŋini m, man nam be sarega ni Winaꞌam pianꞌad yela la. 14 Ka m pu bood ye m tum siꞌel ka fu ziꞌ li tiꞌire, ka fu yelsum na a fu meŋ boodim ka kaꞌ mugusugo.

15 Daasiꞌeree, line ke ka o daa bas fu saꞌan saŋa biꞌela la, ane ye fu lem diꞌe o yaꞌas ka o be ne uf saŋa mekama yuꞌus, 16 ka lem kaꞌ fu yamug maꞌanee, hale o gat yamug ka yuꞌun a baꞌabinoŋir. M noŋ o bedego, amaa fun na noŋ o gaad ala, bozugo o ane fu yamug ka me a fu baꞌabiig, Zugsob la ni. 17 Ka fu yaꞌa sid ane m dolin taa, diꞌem o wuu fun naani diꞌeni m siꞌem la.

18 Ka o yaꞌa daa tum uf ne beꞌed bee more fu siꞌel, fun nokimi li, ka li a m sam. 19 Man Paul, sob neꞌeŋa ne m meŋ nuꞌug, ye m na yoo li wusa. Li pu narin ye m tienn uf ye fu meŋ ane sam doli man. 20 Eenn, m baꞌabiiga, m bood nyood fu saꞌan tinam a yinni ne Zugsob la zug. Bugilimi m suunr ne line dol Kiristo la yela. 21 Man baŋ ye fu na tumi m boodim la zug, ka m sobi tis uf ka miꞌ ye fu pun na tum ka li gaad mam yel uf siꞌem la.

22 M bood ye fu tiꞌeb saam doogi digili m, ka fu Winsosugin la, m mor tiꞌir ye, Winaꞌam na yiis m kpela tis uf.

23 Epafras one ka ti laꞌam be sarega ni Yesu Kiristo yela la, puꞌusid uf. 24 M tumtum tiraan Luuk ne Maak ne Aristarkus ne Demas me puꞌusid uf.

25 Ka Zugsob Yesu Kiristo la yelsum na be ne ya wusa.