Hibru
Hibru tatame remne newopitim siglow.
Kiyi late tuma.
Gwor siglow basrasem tame reri sig nem be mettene. Re siglow basrasem, re God rene omuteke habobem Juda tatame remne newopitim.
Agerbo tame rem er God rene omuteke habobem Juda tatame remne yaper nenbem, rem mus nugwape metbem, eker gwor siglow basrasem tame re remne pap kwuye met tuma basrasem.
Re op basrasem. Jisas re God Reri Yen sekene. Re nowselke temenem, re nugwape mus metem, re God rene be mesegenem. Op nenem, re nemne kebese kwobo late. Re God Reri Tuma wesowbem tatamekene God reri Akeri tamekene remne teitkwunem.
God re Jisas rene lebam, re God Reri Akerri keryen tame som temente. Etop nenem, re Juda tatame remri God Reri Akeri yaku nenbem tame remne teitkwunem.
Jisas re er yaku Hevenke nenbo, re rene omuteke habobo tatame remne kebese sene potte tetane. Moses reri Juda tatame remne wesowem wule re Jisas eter nenbem yaku bukre remne wesowem.
Gwor siglow tatame rem lan tobote, rem God rene omuteke heyarwai habote. Kiyi temenem tame rem God rene omuteke habobemkap, nem etop habote. Nem rene kap mesegente. Be yaper wos tatame remne tete, rem God rene omuteke habon ek sate. Rem Jisas reri wule tobote, yaper wos remne tete, rem mol pan taskuren tetete.
Jisas re God reri kwomri tame remne teitkwuntene.
1
(Sapta 1—2)
God Reri Yen re nemne tuma wesowem.
1 Kiyi God re nemri yeiwarege remne agerbo agerbo yabelke re remne agerbo agerbo wulek tuma ek wesowbem. Re reri tuma wesowbem tame remne kiyi wesowbemke, sene rem er tuma nemri yeiwarege remne ek wesowbem. 2 Gwopte nowsel legete matnaye, God re Reri Yen rene tuma weiwen re nemne er tuma wesowbem. Re kiyi wem, er yen re lip, yabel, nowsel nenem. Nowsel legete, Yen re aboyei wos potte tetane. 3 God eter malebokap er yen re etop malebo. Re har God eterkap, re God eterri tame yopkap. Reri tuma et kitimena bukre tetane, eker eter webokap, nowsel re som tetane. Re tatame remri yaper nen wos poten septikeipem, re Hevenke yawun Keryen Yen God eterri mame yokwok sim. God re Keryen Yen bukrewai.
God Reri Yen re God reri kwomri tame remne teitkwuntene.
4 God re Yener rene sig bukrekene yenbokene newom, eker, Yener re God reri kwomri tame remri keryen yen tem, rem eterri kulke tetane. 5 Kiyi God re Yener rene op wem.
Ne ari Yen.
Gwopte an neri ha teye.
(Buk Song 2:7)
Re sene op wem.
An eterri Ha. Re Areri Yen.
(2Samuel 2:4)
God re reri kwom tame remne etop kirkir be wem. Yehow. 6 Re reri masetebo Yen rene nowselke yerte weraste nenbem, re op wem.
Ari kwomri tame rem
aboyei eterne lom yokwote. 7 God re reri kwom tame
etemne habon op wem.
Ari kwom tame rem polikap
tete.
Ari kwom tame rem ker
taulekap tete.
(Buk Song 104:4)
8 Re Reri Yener rene op wem.
God, ne kwom panen si
tame somsom temente.
Ne neri tatame remne
kwom panen sibo,
ne yenbo wulewou nenbo.
9 Wule yenbo ne okbop tebo.
Wule yaper ne muwai
webo.
Juda tame rem etemri
keryen yen remne kwar
tarek sirbokap,
God re nene lebam, nene
keryen yen wem.
Eker ne okbopwai tebo, ne
2 sig bukre tetane.
Re nene heyar nenemkap,
re agerbo tame remne etop
be nenem.
(Buk Song 45:6-7)
10 God re rene sene op wem.
Haneyen, kiyisapewai ne
nowsel nenem.
Nelri wos mere, ne neri
letke nenem.
11 Nelkene selkene rep yaper
tete tetane.
Neren, ne yaper be tete. Ne
som temente tetane.
Tame oub rem suba ten
weyarbokap,
nelkene selkene rep suba
ten weyarte tetane.
12 Tatame rem tame oub lugen
gwolben rasbokap,
ne nelkene selkene repne
etop nente tetane.
Tatame rem tame oub lugen
agerbo tame oub wubokap,
ne nelkene selkene repne etop
sene nente tetane.
Nerenwou ne etopwou som
temente tetane.
Ne etopkap som temente
tetane.
(Buk Song 102:25-27)
13 Kiyi God re yener rene op wem.
Ne areri let mame yokwok
site.
Yuri an neri peiktame
remne poten neri tewo kulke
pete wurte tetane.
(Buk Song 110:1)
God reri kwom tame remne re etop be wem. 14 God reri kwom tame rem mapkap? Aboyei rem wow. Rem God reri yaku nenbo tame. God re remne werasen yibo, God eter potte tatame remne rem kwobo labo. Rem etop nenbo.