31
Devitgo te balia asęani. Augwaligo te balia po augwa te moni lotu be tempel te Godiba mani sogo wai tiwai po dao.
Bidigo konealubo homu dąų olama, te Godigo aga tau somainu yai
1 Genuai Bidi, ena nageba asobaso, te nago
ena tonaluao.
Nago ena tau sao, nago te boi bidi dabego
ena aiyaba elalumainu me igio.
Nage te doloba pai mu da, nago ena ma selama,
te ena me dolobeo.
2 Nago eno i wabo odolama, tama ena polo ma sao.
Tama tiyu, nage te ena duala sabo madi
te genuai masigi bulu du tiwai elalubao.
Tama nago ena bugagia bobegelalu,
te ena bugagia bidiyu, tama te boi bidi dabego
ena aiyaba me elalugobeo.
3 Mu tama, nage te ena geme
duala sabo pesage tiwai elama,
tama nago ena tonalubo dao.
Tama tibaso, nage ena asobodu poligi pelama,
tama ena te wiegi yai sunumiba odasa pao,
te nago polobadu te sę yaibao po wali gilama tiao.
4 Te boi bidi dabego ena tola somainu
yabo bono gągą muani.
Nago ena bugagia tonalubaso da,
teda ena tede me dologobeo.
Magi baso meni, nage naga te ena geme duala sabo
pesage dao.
5 Ena te eno mobo nage nogoba mobao.
Genuai Bidi, nage te mu kolesaga
naga mu ebo God, nago ena ma sao. * Luk 23:46
6 Nago te tibo god dabede lotu wabo bidi dabe
te wei mu me isiąwai.
Tiali goli, eno konealubo homu nageba dąų wali.
7 Nago ena sesemane sogo
homu dene yai, tama tiyu eno nageba
wiegi yai homu pemene ebao.
Nago eno te sęgę suali, tama nago enaba
te pedalubo dwai ebo kolesaga te koneanio.
8 Nago ena te boi bidi dabego
kalabus emainu me ebeo.
Nago ena bugagia tau siyu, tama ena
te dwagi yai madigi bugagia bidibao.
9 Genuai Bidi, nago te olo tau sabo
wiegi yai kolesaga enabolo yao.
Ena te genuai sęgę elalubao.
Ena gela hauwa weyu, tama eno gedu bo dalio.
Eno dili dabe te bomo kimi meni yani.
10 Te ena haliga sęgęgo digi
ena bidabo ula pęwadage ilali.
Ena gela mu udu gebaso,
tama tiyu, te ena sesabi elama me bidigobeo.
Eno genuai sęgę mu elalubao,
tama tiyu, eno bomo silalio,
tama eno dili tigidali dolobo sę ebao.
11 Te boi bidi dabego dwai posobo po enaba wali.
Tama tibaso, te abagi dabego me enaba po dwai weyu,
tama eno abagi dabego enade dwai wi mu yali.
Ena te sunumidu pobadi,
te bidi dabego ena sulama,
augwali wi peyu ebo dao.
12 Tigidali bidigo ena homu kone ebo tagalali,
augwaligo te isai bidi homu
kone isiąbo tiwai gilama yalio.
Ena te tǫgo nigali sospen sene
alua pobaso sąbo tiwai gilama yai.
13 Eno odali, te boi bidi dabe hauwago
ena posobo po odali.
Augwaligo ena moni wi ilali.
Tama augwa deliba sisinama,
tama enaba dwai sę yabo po mia sai.
Augwaligo ena ela muabo po wai.
14 Tiali goli, tagalao.
Genuai Bidi, eno konealubo homu
nageba dąų wabo da.
Eno te tama wali, nage eno God da po wai.
15 Ena nago nogode sesemane sogo bidibao.
Nago enade te boi bidi ebo bidi me,
te ena pobeasa bilibo bidi dabego
nogode ma dobola sao.
Tiyu, augwaligo ena dolidalio.
16 Ena nago sę bidi da,
nago olo tau sabo wiegi yai
kolesagago ena tau sao.
Nago ena godolo mu ebo kolesaga te siligobeo,
tama tiyu, nago ena ma sao.
17 Genuai Bidi, eno nageba i wabo,
te nago ena tau somainu obao.
Nago ena te boi bidi dabego
aiyaba elalumainu me igio.
Tiali goli, te boi bidi dabe da, dolomainu yao.
Augwali isimainu elama, tama augwa pedauwali
te isibo bidi dabego pesagede pania sai
elalumainu yao.
18 Te bidi dabe augwaligo te hagoma eyu,
te posobo po weyu ebo da,
tama doloba pai bidi dabeba
po dwai weyu ebo dao.
Augwaligo tibo po naga wabo da.
Nago augwali dolama, tama augwa pedauwali
te mu pania somainu yao.
19 Nago te nage dologode bidibo
we bidi olo tau sabo
wiegi yai kolesaga hauwa tolalubo dao.
Nago te nageba konealubo homu dąų wabo
we bidi bugagia tonalubo dao.
Nago te augwali tau sabo
te tigidali we bidi gedude umabo mu ebo dao.
20 Nago te konealubo homu dąų wabo bidi dabe
te nage pąba geme dualubo dao,
tama te augwali elainu te po mia sali bidi dabe,
augwali usu me egobeo.
Nago te nageba homu kęą pabo bidi dabe
geme bugagia dualama,
tama te boi bidi dabego tibo po kisilibo po wabogo
te augwali aiyaba me elalugobeo.
21 Genuai Bidigo nogi ugwaba sao.
Agai enaba dwagi yai sę umabo mu elama,
tama agai ena tau sabo wiegi yai sę yali,
te boi bidi dabego ena pobeasa biliyu,
dolainu yali sogo te ena tau sai.
22 Genuai Bidi, polobadu ena wi mu elama,
tama eno homugo te nago ena sela sąyu,
tama ena nage pąde ma bidigobe homu yalio.
Tiali goli, nago eno gela wabo odoyu,
tama nago ena tau sali, te eno nageba i olama,
enade homu dene eyu, tau sao po wali sogo
te tama tiai dao.
23 Te Godigo we bidi dabe,
dagego aga wei eyu, godolo mu yao.
Agai te aga wali asobo we bidi dabe
bugagia tonalubo da.
Tiali goli, agai te hagoma ebo
we bidi dabeba te dwai dene dolo wei ponobo dao.
24 Dage te Genuai Bidiba konealubo
homu dąų wali we bidi tigidali,
dage bomo elama dolalu,
tama duga haliga sesemane bomo sao.