Yesu tẽnlɛhɛ waa saba kaplãŋ
Yebɛrɛfa
ye
1
Yesu tɛr faale Yãhã kaplãŋ tɔ̃rfa byɛ yaha
1 Faale cãã na, Yãhã naa n pãã wo wãlɛ ne. Ke ke kaplãŋ tɔ̃rfa busãã lɛhɛ naa n wãã pe ya wuhu na, pe n bii naa ke yɛ̃ kaplãŋ pãã, pe byɛ pe kaplãŋ ter ne ke ya wuhu na. 2 Yagaa sẽ na, Yãhã ke yɛ̃ kapãn pãã wo ye ke Dya kãmay na; Yãhã driyɛ̃ kai- byɛ le soho woo koho wo. Yãhã driyɛ̃ kai- byɛ tãhã woo kãmay na. 3 Yãhã nayɔ̃r n yãã Yesu na, tesẽ ke nagboho ne. Yãhã ke ma mii, Yesu ma koo syi. U kaplãŋ ma fãnga ne, koo kẽ ke driyɛ̃ gbã yigi. U nawee- kapee- yee laha kãã pe na. Loo kur ye, u n ka yãhãyĩŋ na, maa nii Yãhã kãndigi koho kuɛ ye, koo gii ke ma wãn byɛ yĩŋ na.
Yesu tɛr yãhãyĩŋ tẽnlɛhɛ yaha
4 Yãhã myaha wãã Yãhã Dya kẽ, ke n tɛr yãhãyĩŋ tẽnlɛhɛ wãŋ yaha. Koo kẽ, u n tɛr yãhãyĩŋ tẽnlɛhɛ yaha. 5 Ye sẽ yãã, Yãhã sẽ kapãn nde syi pãã yãã yãhãyĩŋ tẽnlɛhɛ waa ye ye ma yee:
«Mboo kẽ ma ma ra Dyapuai,
ma gbe nanga na, nawee- ga cã,
n ma ma Tuhufua.»
Ke sẽ maha nde pãã yãã yãhãyĩŋ tẽnlɛhɛ waa wĩĩ na ye ma yee:
«N ga nii u ye Tuhufua draha wo,
u -sẽ ga nii ra ye Dya draha wo.»
6 Yaliile wo Yãhã yee koo ga ke Dyapuai nen nɔ wãã driyɛ̃ wo, woo wii tuu cãã pye wa wãn byɛ yaha, ke le pãã ma yee:
«Yãhãyĩŋ tẽnlɛhɛ byɛ yai
pe naa u myaha sey.»
7 Yãhã lii pãã yãhãyĩŋ tẽnlɛhɛ wĩĩ na, loo ne nde: Ke yee yãhãyĩŋ tẽnlɛhɛ mii gɛ pe sya nii koo wãm, pe ma koo ye tefay wãŋ syi dyaŋ. Ke tẽntẽ- ma ke ye naayĩn wãŋ syi dyaŋ. 8 Ke Dya wĩĩ loo na, Yãhã le pãã ma yee:
«Ma ma Yãhã, ma Yĩŋfua niisaha yãã.
Too yĩnfar nde wãkuayãã wee te na ma ye ye.
Kasroŋ koo kẽ, taa ga naa n pye ma Yai wo.
9 Kasroŋ wĩĩ tãy ma ye,
kapee- wĩĩ sẽ tãy ma ye ye.
Loo ne, ma Tuhufua Yãhã n mboo yãŋ yi
ma nagboho ta ma na ma nampyeŋ- yaha.
Nuhu n -sẽ ma laam yĩĩ.»
10 Yãhã maha yee:
«Yĩŋfua, mboo kẽ
taa kãntraha tãhã ke kai- byɛ fegbecãã na.
Mboo kẽ taa maha yãhãyĩŋ bya tãhã.
11 Too nde byɛ ga ba kua.
Mboo woo na, maa naa n nii yalebyɛ;
kãntraha tesẽ yãhãyĩŋ ne,
te ga ba lɛ te pye klaha-,
12 ma n te kur ta yaha te kuãŋ ne.
Taa ter ga ba te draha gbe mii
nayrefãn dyaŋ pe n le wãlɛr draha wo.
Mboo woo na,
maa naa n kuee ma wãnii na yalebyɛ,
wãkuayãã saa pye ma dyɛ- na ye.»
13 Yãhã sẽ maha nde pãã yãã yãhãyĩŋ tẽnlɛhɛ waa ye ye ma yee, u nii koo kãndigi koho kuɛ ye kai- byɛ yĩŋ na, ke n sya ba u napĩĩ- yĩy kor le u kẽ, pe n nii mii, u tãnde fyãhã tã pe na. 14 Pe yãhãyĩŋ tẽnlɛhɛ ya dyaŋ, pe wee la tẽntẽ- ya Yãhã ye, ke n nii pe lɛhɛ pe ga naa n paha mpãy na, pe yai pe ba sya yaha pe ga nii Yãhã tãy?