នាវកោរាញឞ្រាសងើយនាវតឹមរាង្លាប់មហែ កាលាតី 2

កោរាញអ៝សម៝នអាបាៈអេងរ៝មពោល

1 ត៝ត់ ១៤ នាម់ឞើសកើយនៃ គ៝ប់ហាន់តៃតាប៝នយេរូឆាលឹម ទូតឹជឹត នទ្រែលមាបារនាបាស នអ៝ប់មាលែវតីតុស ហាន់នទ្រែលដ៝ង់។* 2 គ៝ប់ហាន់តាប៝នយេរូឆាលឹម កើតនៃ យ៝រលាសកោរាញឞ្រាសញហើអ៝ន់គ៝ប់ហាន់។ នោកគ៝ប់ហាន់ គ៝ប់ម៝ប់អេងមាផូងកោរាញផូងញឆីងមាឞ្រាសក្រីស មឞើសងក៝ចមាខាន់ពាង់នាវអីគ៝ប់លែៈនតីនោកមឞើសងក៝ចនាវមហែមហានអ្វែសអ៝ន់មាផូងអីមោទីផូងអីឆ្រាអែល នើស គៃមាលើយអ៝ន់នាវអីគ៝ប់ទោលហោមនតីមាឞូ នអ៝ប់មានាវអីគ៝ប់លែៈជេសនតីនៃនើសងខើងមាមោគែសនាវខ្លៃច្រាវ។ 3 ខាន់ពាង់តឹមទីទូនតោរនាវមាគ៝ប់។ ឞ៝លលាសអេល៝រមាឞ្រាសក្រីសទ៝ក់រេសនើស ឞូម៝សអីមោទីផូងអីឆ្រាអែល ជេសរីឆឹតញឆីងមាកោរាញឞ្រាស អ្យាត់មាក៝សនតោគៃមាជេងប៝នលានកោរាញឞ្រាស ល៝ង់តីតុស អីអ៝សនោឞ៝ន់តានាវញឆីងអីហាន់នទ្រែលហេននៃ ឞ៝លលាសពាង់ជេងផូងគ្រែក ឞូក៝ៈមោញច៝ប់ពាង់ក៝សនតោដ៝ង់។* 4 គែសដ៝ង់ឞូនុយ្សអាបាៈអីនទ្រាជានញឆីងមាឞ្រាសក្រីស លាប់នតុងតាផូងហេន អុចតីតុស ក៝សនតោកាដោយ យើនមាផូងកោរាញតាផូងញឆីងក៝ៈមោញច៝ប់ពាង់ដ៝ង់។ ខាន់ពាង់មានមាលាប់គៃមាមេតអ្វាញ់គឹតហេនហោមជានតឹងទឹងលែៈនាវវៃមោឆេ មោលាសមោ ខាន់ពាង់អុចទឹងលែៈផូងញឆីងជានតឹងនាវវៃអីនៃតឹមឞានមាជេងទឹកមានាវវៃអីនៃ តីសមាយ៝រលាសឞ្រាសក្រីស លែៈរាក្លាយ្សឞូម៝សអីញឆីងមាពាង់ លាសនទ្រីមោហោមខាច់អោសជានតឹងទឹងលែៈនាវវៃអីនៃ។* 5 ហេនមោអោសតឹមទីនាវមាខាន់ពាង់អីនៃ ឞ៝លលាសដេៈក៝ៈមោអើមដ៝ង់ គៃមានាវងាន់អីនាវមហែមហានអ្វែសហោមគែសនឹងតាខាន់អៃមៃ។

6 ល៝ង់ផូងអីឞូយើកអីឞូកើបខាន់ពាង់ជេងកោរាញតាផូងញឆីង មោអោសដាៈគ៝ប់នត៝បនទើតានាវគ៝ប់នតីមាឞូ។ ឞ៝លលាសខាន់ពាង់កោរាញទាសក្វ៝ង់កាដោយ ក៝ៈគ៝ប់មោជីឞោកជីតោរដ៝ង់ យ៝រលាសកោរាញឞ្រាសមោអោសកើយ្សឞូនុយ្ស។ 7 ខាន់ពាង់លែៈឆៃជេស កោរាញឞ្រាសដាៈគ៝ប់មឞើសងក៝ចនាវមហែមហានអ្វែសអ្យាអ៝ន់មាផូងអីមោទីផូងអីឆ្រាអែល តឹមឞានមាកោរាញឞ្រាសលែៈដាៈជេសពេត្រោស មាមឞើសងក៝ចនាវមហែមហានអ្វែសអ៝ន់មាផូងអីឆ្រាអែល ដ៝ង់‌* 8 យ៝រលាសកោរាញឞ្រាសអីលែៈអ៝ន់ជេសពេត្រោស គែសនាវទើយជេងកោរាញអ៝សម៝នមឞើសងក៝ចនាវមហែមហានអ្វែសអ៝ន់មាផូងអីឆ្រាអែល ‌ ពាង់អ៝ន់គ៝ប់គែសនាវទើយជេងកោរាញអ៝សម៝នមឞើសងក៝ចនាវមហែមហានអ្វែសអ៝ន់មាផូងអីមោទីផូងអីឆ្រាអែល តឹមឞានកើតនៃដ៝ង់។ 9 ល៝ង់យាកើ ‌ ពេត្រោស * នទ្រែលមាយោហាន អីឞូកើបខាន់ពាង់ទុតខ្លៃជេងតឹមឞានមាមែសតាផូងញឆីង ត៝ត់ខាន់ពាង់លែៈឆៃជេសកោរាញឞ្រាសលែៈអ៝ន់មាគ៝ប់នាវទើយអីនៃ ខាន់ពាង់ញុបតីតឹមរាង្លាប់នទ្រែលគ៝ប់ ញុបតីតឹមរាង្លាប់នទ្រែលបារនាបាស ដ៝ង់ តឹមទីនាវហេនមាហាន់មឞើសងក៝ចអ៝ន់មាផូងអីមោទីផូងអីឆ្រាអែល ជេសរីខាន់ពាង់មាមឞើសងក៝ចអ៝ន់មាផូងអីឆ្រាអែល ។ 10 គែសទូនាវទើមខាន់ពាង់នតិញមាហេន លើយតាច្វេលកើលមាផូងក្រ៝អ៝អាចតាផូងញឆីងតាប៝នយេរូឆាលឹម នទើអីនៃជេងនទើអីគ៝ប់នអើរជាននឹង។*

ពោល មោអោសតឹមទីឞាល់មាពេត្រោស

11 យើនមានោកពេត្រោស ហាន់ត៝ត់តាប៝នអ៝ន់តីយោក ឞ្រីឆីរី គ៝ប់តឹមរាទ៝ង់ដាសពាង់តាងក្លាងឞូឞាល់ យ៝រលាសពាង់លែៈជានតីស។ 12 យាកើ ញជ្វាល់ផូងអីឆ្រាអែល អីញឆីងមាឞ្រាសក្រីស អាបាៈអ៝ន់ហាន់តានៃដ៝ង់។ នោកខាន់ពាង់អីនៃអេហ៝ៈត៝ត់ ពេត្រោស លែៈវៃគុឆោងឆានទ្រែលផូងអីមោទីផូងអីឆ្រាអែល យើនមានោកខាន់ពាង់អីនៃលែៈត៝ត់តារី ពេត្រោស ឞាសគុនទ្រែលផូងអីមោទីផូងអីឆ្រាអែល យ៝រលាសពាង់ក្លាចខាន់ពាង់អីផូងអីឆ្រាអែល នៃលាស†។* 13 ល៝ង់ផូងអីឆ្រាអែល អីញឆីងមាឞ្រាសក្រីស អាបាៈអេងលែវឞាល់ជាននាវនទ៝ប់មពោនកើតពេត្រោស នៃដ៝ង់ នអ៝ប់មាបារនាបាស ជាននតូតនាវនទ៝ប់មពោនតឹងខាន់ពាង់អីនៃជឹត។* 14 ត៝ត់មាគ៝ប់ឆៃខាន់ពាង់មោហោមតឹងនាវងាន់អីនាវមហែមហានអ្វែសនៃ គ៝ប់អោបពេត្រោស តាងក្លាងឞូឞាល់៖ “លាសមៃអីផូងអីឆ្រាអែល មោហោមអោសជានតឹងនាវវៃផូងអីឆ្រាអែល ជានគុងាវតឹមឞានមាផូងអីមោទីផូងអីឆ្រាអែល ច្រាវ លាសនទ្រីមើមមៃទើយញច៝ប់ផូងអីមោទីផូងអីឆ្រាអែល អ៝ន់ជានតឹងនាវវៃផូងអីឆ្រាអែល ? 15 ល៝ង់ឞ៝ន់អ្យាផូងអីឆ្រាអែល ឞើសនទុលមែងាន់ ឞ៝ន់មោអោសជេងផូងអីមោទីផូងអីឆ្រាអែល អីមោគឹតនាល់នាវវៃមោឆេ អីជានរាលាវនាវវៃអីនៃនឹង។* 16 ឞ៝ន់លែៈគឹតជេស កោរាញឞ្រាសមោអោសកើបឞូនុយ្សលែៈឆ៝ង់យ៝រមាជានតឹងនាវវៃអីនៃ ពាង់កើបលែៈឆ៝ង់ជេងយ៝រមានាវញឆីងមាឞ្រាសយេឆូក្រីស ទើម។ លាសនទ្រីឞ៝ន់លែៈញឆីងមាឞ្រាសយេឆូក្រីស ដ៝ង់ គៃមាកោរាញឞ្រាសកើបឞ៝ន់លែៈឆ៝ង់យ៝រមានាវញឆីងមាឞ្រាសក្រីស ទើម មោអោសលែៈកើបឆ៝ង់តាៈឞើសជានតឹងនាវវៃ។ មោគែសអោសឞូនុយ្សលែៈកើបឆ៝ង់តាៈឞើសជានតឹងនាវវៃអីនៃ ទូហ្វេមោអើម”។*

17 អាបៃអ្យាហេនអីផូងអីឆ្រាអែល អីលែៈញឆីងមាឞ្រាសក្រីស អុចកោរាញឞ្រាសកើបហេនលែៈឆ៝ង់តាៈឞើសនាវញឆីងអីនៃ។ ហេនលែៈវ៝ត់ជេស ហេនជេងឞូនុយ្សតីសតឹមឞានមាផូងអីមោទីផូងអីឆ្រាអែល ដ៝ង់ ឞ៝លលាសហេនញឆ្រោយ្សជានតឹងនាវវៃមោឆេ កាដោយ។ ហេនញឆីងមាឞ្រាសក្រីស នទ្រីហេនមោហោមអោសជានតឹងនាវវៃមោឆេ គៃមាកោរាញឞ្រាសកើបហេនឆ៝ង់។ លាសនទ្រីអើមហេនជេងឞូនុយ្សតីស យ៝រមាមោហោមជានតឹងនាវវៃអីនៃឞើស? លាសនទ្រីអើមឞ្រាសក្រីស លែវអ៝ន់ហេនជេងឞូនុយ្សតីស យ៝រមាមោហោមជានតឹងនាវវៃអីនៃឞើស? មោទីអោស!* 18 យើនមាលាសទូហ្វេឞូនុយ្សលែៈជេសមអារ់លើយនាវវៃអីនៃ ជេសរីអាបៃអ្យាអុចជានតឹងតៃនាវវៃអីនៃគៃមាកោរាញឞ្រាសកើបឆ៝ង់ ពាង់អីនៃតឹមឞានមាឞូនុយ្សអុចរាទ៝ក់តៃជឹតនទើអីអាល៝រនើសលែៈលើសរាល៝ម់លើយ។ លាសនទ្រីពាង់អីនៃញហើឆាក់ពាង់នើមលែៈជានតីសដាសនាវវៃអីនៃ។

19 ល៝ង់គ៝ប់ នោកគ៝ប់ញឆ្រោយ្សជានតឹងនាវវៃនើស គ៝ប់ហោមគែសទោយ្សយ៝រមានាវវៃអីនៃ។ នោកឞូងខឹតឞ្រាសក្រីស តាឆីតឹមរាកាង់ គ៝ប់តឹមឞានមាខឹតនទ្រែលពាង់ លាសនទ្រីអាបៃអ្យាគ៝ប់តឹមឞានមាខឹតមពែសមានាវវៃ នាវវៃមោហោមអោសគែសនាវទើយមាគ៝ប់ជឹត គ៝ប់គុរេសគៃមាគែសខ្លៃមាកោរាញឞ្រាសនើម។* 20 គ៝ប់មោហោមគុរេសតឹងនាវអុចគ៝ប់នើម អាបៃអ្យាគ៝ប់គុរេសតឹងនាវអុចឞ្រាសក្រីស អីគុតាគ៝ប់។ នាវរេសអីគ៝ប់គុរេសអាបៃអ្យា គ៝ប់រេសនអ៝ប់មាញឆីងមាក៝នកោរាញឞ្រាសនើមទើម អីពាង់លែៈរ៝ង់ជេសមាគ៝ប់ លែៈជាវឆាក់ពាង់នើមខឹតមានត្រ៝ៈគ៝ប់។ 21 លាសគ៝ប់ហោមជានតឹងតៃនាវវៃមោឆេ គៃមាកោរាញឞ្រាសកើបគ៝ប់ឆ៝ង់ គ៝ប់ជេងមអារ់លើយនាវអ្វែសកោរាញឞ្រាស។ យើនមាគ៝ប់លែៈគឹតជេសកោរាញឞ្រាសមោអោសកើបឆ៝ង់តាៈឞើសជានតឹងនាវវៃមោឆេ កើតនទ្រីទឹងគ៝ប់មោអោសមអារ់នាវអ្វែសកោរាញឞ្រាសអីនៃ។ លាសកោរាញឞ្រាសកើបឆ៝ង់តាៈឞើសជានតឹងនាវវៃ នាវខឹតឞ្រាសក្រីស ជេងទើមទាម មោអោសគែសខ្លៃ។

*2:1 ២:១-១០៖ ការ ១៥:១-២៩

*2:3 ២:៣៖ តត ១:៤

*2:4 ២:៤៖ កាល ១:៧; ការ ១៥:១, ២៤

*2:7 ២:៧៖ ការ ៩:១៥; រម ១:៥

*2:9 ២:៩៖ តានាវងើយគ្រែក លាស៖ «កេផាស »។ គែសកើតនៃដ៝ង់តាត្រ៝ង ១១, ១៤។

*2:10 ២:១០៖ ការ ២៤:១៧; រម ១៥:២៥-២៨, ៣១; ១កោ ១៦:១-៤; ២កោ ៨:១-១៥, ១៩-២០; ៩:១-១៥

†2:12 ២:១២៖ ផូងអីឆ្រាអែល កើបពាង់មោហោមក្ល៝ស លាសគុឆោងឆានទ្រែលផូងអីមោទីផូងអីឆ្រាអែល ។

*2:12 ២:១២៖ ការ ១០:២៨; ១១:១-៤; អេផ ២:១៤

*2:13 ២:១៣៖ កាល ២:១; ការ ៤:៣៦

*2:15 ២:១៥៖ ២កោ ១១:២២

*2:16 ២:១៦៖ កាល ៣:១០-១៤; នម ១៤៣:២; រម ៣:២០, ២៨; ៤:៥; ៩:៣២; ១០:៤; អេផ ២:៨-៩; ២កោ ៥:១៨-២១

*2:17 ២:១៧៖ កាល ៣:១០-១១; ការ ១៥:១០-១១

*2:19 ២:១៩-២០៖ រម ៦:៣-១១; ៧:៤; ៨:១០; ២កោ ៥:១៤-១៥; ២តម ២:១១